5
1 Thiempu laltakhai chu mihriem laia inthoka thlang suok an ni hlak a, mihriemhai aiawa Pathien tienga rongbawlna sin thaw ding le thilpêkhai le suol ta dinga hlànbiekna inhlăntu dinga ruot an ni hlak. 2 Hràtnawna tlâk buok ve tho an ni leiin mi mawlhai le lam inhmanghai dawthei taka dom dan an thiem hlak a. 3 Chuleiin, mi dang ta dinga suol ngaidamna thilhlân an inhlàn ang bokin anni suol ngaidamna thilhlân khom an inhlàn vê ngei ding a nih.4 Hi ngirhmun inzaum tak hi mani an inpêk el ngai naw a, Aron hai anga Pathien kohai chauin an chel hlak. 5 Chuong ang bokin Krista khomin thiempu laltak nǐna ropui tak chu ama le ama a’n pek el nawh.
“Nang chu ka Naupa i na,
Voisun hin i Pa ka ni tah”
titu khan a ruot lem a nih.
6 Hmun danga khom
“Nang chu Melkisedek thiempŭna anga
Chatuon thiempu i ni ie”
a ti bok a.
7 Isun hnuoi taksa a put lai nihai khan thinaa inthoka sansuok theitu chu inring taka koin a kuomah mitthli tla pumin a trongtrai a. Inză taka Pathien thu a awi leiin a hnǐna chu ngaithlâkin a um a. 8 Naupa meu khom ni sien, a thil tuora inthok chun thu awi a’n chŭk a, 9 sukfamkim a hung ni chun ama thu awituhai po po ta dinga chatuon sandamna hnârpui a hung ni a, 10 Melkisedek anga Thiempu Laltakah Pathienin a ruot tah a nih.
Puitling le naute
11 Hi chungchanga hin hril ding tam tak kan nei a, sienkhom thil in la man hrat nâw ĕm leiin hang hrilfie khom a harsa a nih. 12 A hun ngaituo chun zirtirtu ni ta hiel ăwm in nia chu, Pathien thu a bul rĕta inthoka inchûktir in ngai nawk tah a, buchangrum nêkin nenetui in mamaw a ni hi. 13 Nene ne lai chu nautê an la ni leiin bu rum, felna thu chu an la fàk thei nawh. 14 Buchangrum chu mi puitling, a sie a thra thlier thiem dinga lungril sawizoi tahai fàk chi a nih.