4
1 Chuleiin, a chăwlnaa lŭt theina thutiem a la ngîr zing sŭng hin nangni laia mi tu khom lût dinga inhnu taluoa inngai in um pal nawna dingin fimkhur ro.2 An kuoma Chanchin Thra hril a ni ang bok khan eini kuoma khom hril a ni ve a, sienkhom an thu hriet chu ringa an zawm si naw leiin an thrathnempui dĕr nawh.3 Eini ringtuhai hi a chawlnaa lût tahai chu ei nih. Pathienin hnuoi le van a siem zo khan a sin a chawlsana chu,
“Lungsena ka’n khăm ang khan,
Ka chawlnaah lut naw ni hai”
a la ti zing a nih.
4 Ni sari ni thua chun, “Pathienin a sinthaw po po ni sari niin a chawlsan tah a” tiin khaw lai amanih ziek a ni kha. 5 A chunga thu ei tarlanga khan “Ka chawlnaah lut naw ni hai” ti thu a hril bok a. 6 Chanchin Thra dong hmasatuhai khan an ring naw leiin lût thei naw hai sien khom threnkhat ta ding ruok chun a chawlnaa lŭt theina a’n hong zing a nih. 7 Chuleiin, ei hril tah, ‘Voisun hin a rawl in hriet chun in lungril sukngar naw ro’ ti Davida hmanga hril kha kum tam tak hnungah Pathien chun ni dang, ‘Voisun’ a ti chu a hung ruot nawk tah a nih. 8 Josua khan, ‘chawlnaa’ chun thruoi lut ni sien, Pathienin hun dang ruot nawk ta naw nih. 9 Chuleiin, Pathien mihai ta dingin ‘chawlna’ hun dang a la um nawk ding a nih. 10 Pathienin a sinthaw a chawlsan ang bokin Pathien tiem chawlna changtuhai chu an sin inrimnaa inthokin an la chăwl ding a nih. 11 Ringnawna leia an tlŭk ang khan tu khom ei tlŭk ve nawna dingin, chu châwlnaa lût ding chun theitawp suo seng ei tiu.
12 Pathien thu chu a hring a, thil a thaw thei a,a kawlhnâm ngei ton ieng ang nĕk khomin a ngei lem a, hringna le thlarau inzomna lai tak le rù le châng le thlin inchuktuona lai khom a sun tlang thei a, lungrila ngaituona le tumhai khom a hriet nghăl thei a nih. 13 Pathien mita inthoka thup thei thilsiem ieng khom a um nawh. Ei chungthu ei hrilna ding mit hmua chun iengkim hi saruok le inhong sâ vong a ni lem.
Thiempu Laltak Isu
14 Chuongchun, vanhai khom fe thleng tah thiempu laltak le ropuitak Isu, Pathien Naupa chu ei nei leiin ei thuring hi chel tlat ei tiu. 15 Ei hratnawnahai mi hrepui phăk lo thiempu laltak nei ei ni naw a, eini ang boka kong tinrênga thlĕmna tuok tah, suol ruok chu suol lo nei ei ni lem. 16 Chuongchun, thrangpui ei ngai hun takah zangaina le lunginsietna ei hmu theina dingin, lunginsietna lalthrungpha chu nêl takin hnai ei tiu.