Mosie nĕka ropui Isu
3
1 Chuleiin unau thienghlim, van kona chang vetuhai, ei thuringa Tirko le Thiempu Laltak Isu chu, ngaituo ro. 2 Pathien sungkuo po po ta dinga Mosie a ringum ang bok khan ama chu a ruottu ta dingin a ringum a nih. 3 In bawltu chun a in nĕka chawimawi a hlaw lem hlak angin, Isu khom Mosie nĕka ropuina nasa lem hmu tlâk a nih. 4 In tin hi tuin amanih an indin a na, iengkim indintu ruok chu Pathien a nih. 5 Mosie chu siehlaw niin, Pathien sungkuo pumpui ta dingin a ringum a, Pathienin thu a hril dinghai puong sawngtu a nih. 6 Krista ruok chu Naupa niin, Pathien sungkuo ta dingin a ringum a nih. Eini hi a sungkuohai chu ei nih, ei suong rop beiseina hi ringzo taka ei chel zing phot chun.Pathien mihai ta dinga chawlna
7 Chuongchun, Thlarau Thienghlim chun hieng hin a hril a:
“Voisun hin a râwl in hriet chun,
8 Thlalĕra fiena in tuok lai le
In hel lai nihai ang khan,
In lungril sukngar naw ro.
9 Kum sawmli sung in pi le puhan,
Ka thilthawhai hmu zingin,
Ensinin an mi fie a;
10 Chu suon po po chunga chun,
Ka lung a sen êm êm a,
‘An lungril a fe suol zo tah,
Ka lampui an hriet ta nawh;
11 Lungsena ka’n khâm angin,
Ka chawlnaah lut naw ni hai’
tiin ka puong a ni kha” tiin.
12 Unauhai, fimkhur ro, chuong naw chun Pathien hring tlŭksan dingin tu lungril amaniah ring nawna suol lût pal hlauh rawi a tih. 13 ‘Voisun’ ti a ni sung hin nangni laia tu khom suol hlĕm thlŭka um a, lungril an sukngar nawna dingin ni tinin infŭi tuo lem hlak ro. 14 A tǐra ei ringzona kha a tawp chena ei vong tlat phot chun Krista intrawmpuituhai ning ei tih.
15 "Voisun hin a rawl in hriet chun,
In hel lai nihai ang khan,
In lungril sukngar naw ro”
ti a ni kha.
16 An leh tuhai am an na hre zing sia hel kha? Aiguptaa inthoka Mosie thruoi suokhai po kha an ni nawm a nih? 17 Tuhai chung am a na kum sawmli zet a lungni naw kha? Thilsuol thawtuhai, an ruong thlalĕra zâl tahai chunga khan a ni nawm a ni? 18 Thu awi nawhai chunga chauh naw chu tu kuom am a chawlnaa lut lo dingin thu a’n khăm a? 19 Chuongchun, an ring nawna leiin an lŭt ve thei ta nawh ti ei hriet.