Sandamna ropui
2
1 Chuleiin, ei thu hriethai kha ei poisa nawk zuol ding a nih, chuong naw chun intol hmang hlauh rawi ei tih. 2 Vantirkohai hmanga thu a hrilhai hman a nghet a, a bawsetu le poisa nawtu taphot chu an phù anga hrem an ni pei si chun, 3 hieng ang lawma sandamna ropui hi ei ngaithâa vai chun ieng tin am hrem chu pumpel lul ei ta? Chu sandamna chu Lalpa ngeiin a hung puong hmasa a, a thu hretuhaiin an mi namnghetpĕk a. 4 Pathien ngei chun inchikna thilmak le thilmak hrang hranghai chu thawin, Thlarau Thienghlim thilpêk chu trûl a ti ang peia semin a mi hung namnghetpek bok a.Sandam dinga mi thruoitu
5 Khawvel la hung um ding chu vantirkohai thu hnuoiah a sie nawzie thu ei hril a ni hi. 6 Chuong nêk hmanin tuin amanih hieng hin a lo hril kha:
“Hringmi hi iem a ni hrim a,
I hriet fuk lop lop el ni?
Hriem nauhai khom iem an na,
I ngaisak em em el ni?
7 Angelb hnuoi thretah siein,
Ropuina le chawimawina,
Tonlairang i’n tontir a,
8 A ke hnuoiah i sie vong”
tiin. A ke hnuoiah iengkim Pathienin a sie leiin ama hnuoia sie naw thil ieng khom a um nawh. Tu ruok hin chu iengkim ama hnuoia um angin ei la hmu hri nawh.
9 Amiruokchu, “vantirko hnuoi threta sie” Isu ruok chun thǐna a tuor leiin ropuina le chawimawina inkhumtir a ni tah ti ei hmu a, Pathien lunginsietna zarin mi tin ta dingin thǐna a’n temtir tah a nih.
10 Ama zâra iengkim um le ama ta dinga iengkim um bok, a ropuina chang ve dinga nau tam tak thruoi lûttu Pathien chun tuorna hmanga sandamna siemtu sukfamkim chu awm a ti hlè si a. 11 Mihriemhai sukthienghlimtu le sukthienga umhai chu Pa thuhmuna inthoka suok an ni leiin, Isun anni rawi chu “Unauhai” tia ko a’n zak nawh.
12 “Ka unauhai kuomah i hming lam ka ta,
Kohranhai lai i’n pakna hla sak ka tih.”
a ti a nih.
13 Chun, “Amaah ka ringna innghat ka tih” a ti bakah “En ta, kei le Lalpa mi pek naupanghai hi” a ti bok a. 14 “Naupang” a tihai hi taksa le thisen put an na, ama khom chuong ang bok chu a hung ni ve tah a nih. 15 Chuongchun, thǐna chunga thuneitu Diebol chu a thǐna leiin a suktlawm a, dam sunga thi inlau rêng rĕnga um hlak, tritna bawia intânghai chu a’n suo tah a nih. 16 A hung ngaisakhai hi vantirkohai ni loin Abraham thlahai an ni lem. 17 Chuleiin, a mi lainattu Pathien ta dinga Thiempu Laltak, ringum tak, mi po po suol thupha chawina inhlăntu ni ding chu, kong iengkimah a unauhai anga a hung um chu a trûl hrim a nih. 18 Ama ngei chu fiena tuor muolsuo tah a ni leiin thlĕmna tuorhai khom a thrangpui thei a nih.