HEBRAI
Naupa ropuina
1
1 Pathienin kha hma khan zawlneihai hmangin kong hrang hrangin ei pi le puhai kuomah thu voi tam tak a hril hlak a. 2 Tuta hun nuhnunga ruok hin chu eini kuomah Naupain thu a hung hril ta thung a. Ama chu iengkim chunga rohluotuah a ruot a, ama hmangin hnuoi le van a siem a. 3 Ama chu Pathien ropuina var mawi le a zepui puttu a ni a, iengkim hi a thu thilthawtheina chun a tungding a, suol faina lampui a siem hnungin Chunghnungtak chang tieng khin a hang inthrung tah a. 4 Vantirkohai nĕka hming chunghnung lem daih hluotu a ni leiin anni nêk daiin a ropui lem a nih.5 Vantirkohai lai tu kuom am Pathienin,
“Nang chu ka Naupa i nih,
Voisun hin i Pa ka ni tah”
ti amanih,
“A ta dingin Pa ning ka ta,
Ka ta dingin Naupa ning a tih”
amanih a ti hlak a?
6 Naulutir ruok chu khawvela a hung tir khan,
“Pathien vantirko po poin
Ama chu chawibiek raw hai se”
a ti a ni kha.
Vantirkohai chungchang thu a hrilnaa chun,
7 “Thli hi i tir palai an na,
Van meichok i siehlaw an nih”
a ta.
8 Naupa thu a hril ruok chun hieng ang hin a ti thung a:
“Aw Pathien, i lalthrungpha chu
Kumkhuoin um zing a tih;
Indikna lal hmol ngei chu.
I ram lal hmol a ni si a;
9 Felna chu i ngaina a,
Suol tieng i theida leiin,
Pathien, i Pathien ngei chun
I ruolhai nĕka nasa’n,
Hlimna hriek a năl ta che.”
10 Chun, hieng ang hin a ti nawk bok a:
“A tirin hnuoi thrut i phŭm a,
Vanhai khom i kutsuok an nih.
11 Sienkhom la thamral vong an ta,
Nang ruok chu um kumkhuong i tih;
Puon angin la chul an ta,
Silfen angin la hnâwl i ta,
An rêngin la bohmang an tih.
12 Nang ruok chu i pangngai zing a,
I kumin kin ni nei naw nih.”
13 Vantirkohai lai tu kuom am Pathienin,
“Ka chang tieng hin inthrung rawh,
I hmêlmahai i ke sirsan a,
Ka siem hmâ khat chun”
a ti hlak a?
14 Vantirko po pohai chu sandamna changtu dinghai rongbawltu dinga tir suok thlarau an ni naw am a ni?