File 1

FILEMON

Chibai bûkna

1 Paula, Krista Isua mi tâng le ei unaupa Timothe chun kan thawpui le ruol dit tak Filemon hai, 2 kan farnu Afi hai, sipaipui Arkipa hai le i ina inkhawm kohran mihai chibai kan bŭk. 3 Ei Pa Pathien le Lalpa Isu Krista kuoma inthoka lunginsietna le inremna chu in kuomah um raw se.

Filemon hmangaina le ringna

4 Ka trongtrainaah ka hriet zing hlak che a, 5 Lalpa Isu i ringna thu le mi thienghlimhai i hmangaizie thu hrein ka Pathien kuomah lawmthu ka hril hlak. 6 Krista ta dinga thil thra ei thaw dinghai chu hmu chieng a, i ringna trangkai taka mihai ta dinga i hmang theina dingin ka trongtrai bok hlak.^a 7 Unaupa, i hmangaina thu ka hrietin ka lawm hle a, mi thienghlimhai lungril khom i chok har leiin thla i sukmuong nasa êm êm.

Paulan Onesima a hnipèk

8 Hi lei tak hin annawm, Kristaa unau ei ninaah i thaw ding awm chu thaw dingin thu pe ngam lang che khom, 9 hmangaina sirsana hmangin kei putar^b tah Paula, tuta Krista Isu leia intâng hin, a ngĕnin ka ngĕn lem chê a nih. 10 Ka naupa Onesima, kol bun puma naua ka nei, ta ding hin ka ngĕn chê a nih. 11 Tuta hma khan i ta dingin mi hmang tlak naw ni hlak sienkhom tuhin ka ta dingin a trangkai^c a, i ta ding khomin trangkai tàng a tih.

12 Tu hin lungrilin inro hle lang khom, i kuomah ka hung tirkir a nih. 13 Chanchin Thra leia ka’n tâng sung hin i aia mi thrangpuitu dingin mi umpui pei sien ka nuom hle a; 14 amiruokchu, i remti naw zawng ieng khom thaw ka nuom nawh, i mi hmangaina chu thaw luina lei ni loa nangma puoksuok ngeia inthok a ni theina dingin. 15 Iemani chen a tlănsan che hi i kuoma a ngam song theina ding lem ning a tih. 16 Tu hin chu bawi ang ni ta loin, bawi nĕka hlu lem, unau dittak a ni tah a, ka ta dingin a ditum ĕm êm a, i ta ding khomin taksa tieng thil le Lalpaa unau a ninaah ditum zuol ngei a tih.

17 Chuleiin, i thawpui nia i mi ngai takzet chun keima ang elin ama hi lo lawm rawh. 18 I lakah thaw indik naw amanih le bat dâm amanih a nei chun ka rul dingin lo sie la, 19 kei, Paula hin keima kut ngeiin ka rul ding thu ka ziek a ni hi. Ka lakah nangma ngeiin i bat ve thu ruok chu ziek ka tum nawh. 20 Unaupa, Lalpa leiin hi thil hi mi thawpêk la, Kristaah ka lungril suklawm rawh.

21 Ka ngĕnna che hi a hlawtling ngei beisei tlatin ka ziek a ni hi, ka beisei nêk hmana nasa lemin i thaw ka ring nghê nghĕ. 22 In trongtrainahai dona um a, in kuoma ka hung suok ka beisei leiin tlungna ding in mi lo ngaituopèk ro.

Inthlăna chibai

23 Epafra, Krista Isua ka’n tăngpui hin chibai a bŭk che. 24 Ka thawpui Marka hai, Aristarka hai, Dema hai le Luka hai hin chibai an bŭk che. 25 Ei Lalpa Isu Krista lunginsietna chu in rênga kuomah um raw se.