Zirtirna hrisel
2
1 Nang ruok chun thuring indik chu inchuktir pei rawh. 2 Putarhai chu insûm thei, inzaum, inthunun thei, ringna indik chel, hmangaina nei mi le mi dawthei ni dingin infui rawh. 3 Chuong ang bokin pitarhai khom an chĕt dănah mi inzaum ni ding dam, mi hrilsiet chîng lo ding dam, uoiin hè mi ni lo ding dam le thil thra inchuktir chîng ding damin infui rawh. 4 Pitarhai chun nupui tebophai chu an pasalhai le an nauhai hmangai ding dam, 5 insûm thei ding dam, invong thienghlim ding dam, insung khawsaka inhmang rim ding dam, ngilnei ding dam le mani pasal thu awi ding damin inchuktir hai sien; chuongchun Pathien thu hi hrilsietin a um naw ding a nih. 6 Chuong ang bokin tlangvalhai khom mani inthunun dingin infui tawl rawh. 7 Thil iengkimah an enton dingin thil thra thaw hmu la, în chûktirnaah i ringumzie le titakzie inentir rawh. 8 Trongkam mawi, soisel bo hmang hlak la, chuongchun a khingtuhai che chun demna ding che hre nawng an ta, inzak letling lem hiel an tih.
9 Bawihai chu kong iengkimah an puhai thu hnuoiah intuklut a, an lawmzawnga um tum a, don let ve lo ding dam le 10 an thil inrupêk loa kong iengkimah ring tlâka um lem ding damin inchûktir la, chuongchun mi sandamtu ei Pathien zirtirna hi a hlutzie iengkimah an suklang ding a nih.
11 Mi po po sandama an um theina dingin Pathien lunginsietna a hung inlang tah a. 12 Chu chun Pathien ngaisak nawna le khawvel tieng thil bansan a, tu lai huna hin mani invong fel a, indik taka khawsa a, Pathien ngaisaka um dingin a mi’n chûktir a. 13 Ei beisei, Pathien le Sandamtu Isu Krista ropui taka a hung inlang ni ding chu ei nghak a nih. 14 Ama ngei chu ei ta dingin an pĕk a, bawsietna tinrêng laka inthokin a mi’n tlan suok a, ama mi ni dingin a mi sukthienghlim a, thil thra thaw châkna a mi’n neitir bok a nih.
15 Hieng thuhai hi puong la, infui tawl la, thu nei takin zil rawh. Tu khomin ngainêp naw raw hai se che.