3 Kha hma khan eini khom invêt tak, lulul tak, thruoi hmanga um, châkna le hoithawna tinreng bawia intâng ei na, mi thîka an sietna zong hlak, theidaum tak le intheida tuo chîng mi ei ni hlak. 4 Amiruokchu, ei sandamtu Pathien ngilneizie le a mi hmangaizie a hung inlang khan, 5 einin thil ei thaw thrat lei ni loin, a lunginsietna lei chauin, a mi sandam tah a, siem tharna tuiah mi phûmin, Thlarau Thienghlimin a min cher thar a. 6 A mi sandamtu Isu Krista zarah ei chunga hin siemtharna thlarau chu tiktlai takin a hung buok ta treu a, 7 chuongchun, chatuon hringna beiseitu le rohluotua mi siem dingin a lunginsietna leiin thiem a min changtir tah a nih.

8 Hi thu hi a’n dik a nih. Pathien ring tahai chun thil thra thaw nuomna lungril an put pei theina dingin hieng thu hi hril uor dingin ka dit che. Chu chu thil thra tawp a na, tu ta ding khomin a trangkai. 9 Insêlna invetthlak hai, thlatuhai trobul sui rak dam, Dan thua insêl luoi luoi dam nghatsan rawh; trangkaina a nei naw a, tu khomin an hlawkpuiin an trangkaipui bok nawh. 10 Inthrè darna suksuoktu chu voi khat zil la, a sim naw leh zil nawk la, chu hnunga ruok chu ngaisak zui nuom ta naw rawh; 11 chuong ang mi chu mi suol tak le lungril kawi tak put a nih ti hre rawh; ama le ama thiem naw inchangtirtu a ni si a.

12 Artema amanih le Tukik amanih i kuomah ka hung tir charin Nikapoli khuoah hung nghal tum rawh, chu taka chun thlasik sung po um ka tum a nih. 13 Ukil Zena le Appolo hai kha an inzinna lampuiah ieng khom an tlaksam nawna dingin i theitawpin lo thrangpui rawh. 14 Ei mihai kha thil thra thawin inhmang hlak raw hai se, hmang loa um mei mei loin, an ni tin mamaw inphuhrûk raw hai se.

15 Ka kuoma um po po hin chibai an buk cheu. Ringnaa ei ruolhai kha chibai ka buk. In renga kuomah lunginsietna um raw se.