4 Ringna ka’n tlângpui, ka naupa indik tak Tita, chibai ka buk che. Pa Pathien le ei Sandamtu Krista Isua inthoka lunginsietna le inremna chu i kuomah um raw se.

5 Thil ei la sukfel hman băk sukfel dinga Kret thlierkara ka maksan che le thurawn ka pek ang che khan khaw tinah an upa dinghai ruotpek rawh. 6 Upa chu dem kai lo, nuhmei pakhat nei a ni ding a na, a nauhai khom ringtu, inhoithawna tienga soisel kai lo le lulul lo an ni ding a nih. 7 Kohran hotu chu Pathien sin enkoltu a ni leiin, dem kai lo mi ni sien, mi indu, lung inrom, uoiin hĕ mi, kutthlâk hmang le indik lo taka hlawkna zong mi a ni ding a ni nawh. 8 Chuong nêk hmanin upa chu mi lawm thiem le tiktlâi, thil thra dit mi, insûm thei, mi ngîl, mi thienghlim le mani inthunun thei mi ni raw se. 9 Kan thu zirtir ringum tak hi kan zirtir ang chara nghet taka cheltu a ni bok ding a nih; chuongchun thuring indik inchuktir thei a ta, a kaltuhai khom sêl dong thei bok a tih.

10 Hel hmang, nuoma inpawt mei mei le mi hlêm chîng an um treu kha, chuonghai chu sertanhai laia mi an ni deu tak. 11 An bau khărpek ding a nih; a sûng sûngin an chok buoi a, indik lo taka sum hmu inbeiseiin zirtir naw ding ding an zirtir a. 12 Kret mi ngei, anni zawlnei pakhatin, “Kret thlierkar mihai hi mi khêlhlip, ramsa anga kol le thabo virkâwng ruol an nih” a lo ti hi thu indik a nih. 13 Chuleiin, ringna hrisel tak an nei theina dingin na takin zil tawl la, 14 Judahai pipu thusim khûkpui mei meitu le thutak hnawltuhai thu chu awi ta naw raw hai se.

15 Mi thienghlim ta ding chun iengkim hi a thienghlim a, mi porchè le ringna nei nawhai ta ding ruok chun ieng khom hi a thienghlim khur a um nawh- an lungril le an sie le thra hrietna chenin a porchè a nih. 16 Pathien hretuah an inngai a, sienkhom an thilthawhaiah an hnawl bok si a. Anni rawi hi mi lulul le hnămum tak an na, thil thra ieng khom thaw dingin hmang tlak an ni nawh.