Ni hnuhnunga mihai um dan ding
3
1 Ni nuhnunga hai chun hun khir tak a hung tlung ding a nih ti hre rawh. 2 Mani chauh inhmangai hai, tangka sum ngaina hai, mi uongthuong hai, intivei hai, trong tlahol hai, nu le pa thu awinaw hai, lawmna chang hre lo hai, mi porche hai, 3 lunginsietna piengpui lo hai, ngaidamna nei lo hai, mi hril siet chîng hai, insûm thei lo hai, mi tawrothai, thil thra hrim hrim dit lo hai, 4 inphatsan hmang hai, poisak nei lo hai, chapo hai, Pathien hmangai nêka mani inhoitirna lawm mi hai, 5 a langa insuksakhaw mi vieu sia a thilthawtheina hnâwl tlat si hai chu an hung suok ding a na, chuong mihai laka chun inthier fihlim dai rawh. 6 Chuong mihai chu tlăktlum tumin mi inah an lĕng lăwr a, nuhmei hrât lo, suolin a bŭk thlŭk le an châkna suol ang peia thle mihai chu an zăwr thlŭk hlak. 7 Chuong ang nuhmeihai chu thil inchŭk pei vieua inlang, sienkhom thutak hre thei bok si lohai chu an nih. 8 Jannia le Jambria-in Mosie an dodal ang khan hieng ngaituona porchè le ringna tehlĕm neituhai hin thutak an dodăl a. 9 Sienkhom, ieng rak tlung naw ni hai, Jannia le Jambria ang bok khan an invêtzie mihaiin an inhmai teuh awm si nawh.
Timothe infuina
10 Nang ruok chun ka zirtirna hai, ka um dan hai, ka thiltum hai, ka ringna hai, ka dawtheizie hai le ka selzie hai i hriet a. 11 Antiokeia dam, Ikoniama dam le Lustra khuoa dam sukdŭdăna le harsatna tam tak ka chunga tlunghai ka tuor nasatzie le chuonga inthoka Lalpan a mi san suok dan hai chu i hriet a. 12 Tu khomin Krista Isu ang taka khawsak a tum phot chun sukdŭdăna tuok ngei a tih. 13 Mi suolhai le hlĕm hmanghai ruok chu an chan chău deu deu a ta, mi dang an hlĕm ang bokin hlĕmin um ve’ng an tih. 14 Nang ruok chu i thil inchŭk tah le i pom nghet tah kha chel tlat rawh, a zirtirtu che i hriet si a. 15 I naupang laia inthokin Isu Krista ringna leia sandam ni dinga kawkhmutu che Pathien Lekha thuhai chu i hriet ta hlak kha. 16 Pathien inthuok khum Lekha Thu po pohai hi felna konga inzirtirna ding dam, inkâwkna ding dam le insiem thratna ding damin a trangkai ĕm ĕm. 17 Pathien mi taphot chun hre bel hai sien, thil thra tinrêng thaw thei dinga inthuom an ni theina dingin.