4
1 Pathien le Krista Isu, mihring le mithihai ro rêltu ding hmaah, a hung năwkna le a ram sâlin thu ka pêk che:2 Thu chu hril rawh; a huna khom a hun nawa khom hril dingin inpei zing rawh; dawthei taka zirtirin, an indik nawnaah kawkhmu la, zil la, infŭi rawh.3 Zirtirna indik an ngaithlăk pei naw hun a la hung tlung ding a nih. An nuom zawng ngaithla ding le an na ver zawnga hriltu ding zirtirtu tam tak an fiel khawm hun la tlung a tih.4 Thutak hre dingin an nà suksêt an ta, pipu thusim tieng ná daw lem an tih.5 Nang ruok chu iengkimah thluok fîm takin um la, harsatna tuor fán fàn la, tirko sinah inbûr la, i rongbawlna sin po po kha hlen rawh.
6 Kei chu inhlăn dinga bun suokin ka um mĕk tah a, ka fe suok hun a tlung tah. 7 Intlănsiekna thra chu ka zo tah a, ka tlăn chen ding khom ka suo tah a, ringna chu ka vong zing a nih. 8 Tuta ka hmabâk chu felna lallukhum dong chauh a ni tah a, chu chu rorêltu indik Lalpa chun, chu Ni-a chun mi pe’ng a tih, keima chauh ni loin, a hung nawkna nghâkhlàtu po po khom pe’ng a tih.
Mimal chungthu hrilna
9 Ka kuomah hung nawk vak tum hrâm raw khai. 10 Dema chun tu lai khawvel a ngainat leiin Thesalonika tieng a mi fesan tah a, Kreska chu Galati ramah a fe a, Tita khom Dalmatia ramah a fe bok a. 11 Luka chauin tuhin a mi umpui a nih. Marka kha rongbawl konga mi thrangpuitu thra tak a na, hung thruoi ve rawh. 12 Tukik chu Efesi khuoah ka tir tah. 13 I hung pha leh Troas khuoa Karpa kawla korfuol ka maksan kha hang la la, ka lekhabu leh, abikin savun lekhahai lem kha chu hung chawi ngêi ngĕi rawh.
14 Dar sung thiem Aleksandra khan ka poi a tawk nasa hle a, a thilthaw ang peiin Lalpan la thungrul a tih. 15 Nang khom ama laka khan fimkhur rawh, ei thu a kal nasa hlè a nih.
16 Ka thiemna thu ka hril hmasa tak trum chun ka tienga thrang tu khom an um naw a, an mi thlàthlam vong a nih. A maw chu phur naw hrăm raw hai se. 17 Sienkhom Lalpa ruok chun a mi ngǐrpui a, keima hmanga Jentelhai po po hrieta Chanchin Thra chu puong dar vong a ni theina dingin a mi sukhrăt a. Sakeibaknei baua inthokin san suokin ka um a. 18 Lalpa chun thil thra naw laka inthokin mi san suok pei a ta, him takin a van ram chu mi’n tlun a tih. Chatuon chatuonin ropuina chu a kuomah um raw se. Amen.
Inthlăna chibai
19 Priskilaa le Akuila hai kha Onisefora sunghai leh chibai ka bûk. 20 Erasta chu Korinth khuoah a um zing a, Trofim ruok chu Mileti khuoah damloin ka maksan. 21 Thlasik hmâ ngĕia hung tlung tum hrâm rawh. Eubul hai, Puden hai, Lina hai, Klaudia hai le unau po poin chibai an bŭk che.
22 Lalpa chu i thlarâu kuomah um raw se. Lunginsietna i kuomah um raw se. Amen.