Krista Isu sipai thra
2
1 Ka naupa, Krista Isu lunginsietna chun sukhrât che raw se. 2 Mi tam tak hrieta ka zirtirna i ngaithlăkhai kha inchŭktir sâwng pei thei ding ăwma mi i ring tawkhai kuomah inbà sâwng pei rawh. 3 Krista Isu sipai ringum angin rinum mi tuorpui ve rawh. 4 Sipai chu a hotu suklawm dingin khawvel thil dangah a’n kei buoi ngai nawh. 5 Inruolsieknaa thrang khom dan ang taka a thaw naw chun lawmman a hmu thei nawh. 6 Lohma tieng khom, sin inrimtu chun ra hmasa chu a chang ding a nih. 7 Ka hrilhai che hi ngaituo chîk la, Lalpan kong iengkimah hrietthiemna inril pe’ng a ti che. 8 Chanchin Thra ka hril hlak, Isu Krista, Davida thlaa mi, mithi laia inthoka tho nawk tah thu kha hre zing rawh. 9 Chu Chanchin Thra lei chun rinum ka tuor a, tuolthattu ang ela khaidieta khit ka ni hi. Pathien thu ruok chu khuop ruol a ni nawh. 10 Chuleiin, Krista Isua um sandamna chu chatuon ropuina leh an chang theina dingin thlanghai leiin hieng po po hi ka tuor a nih. 11 Hi thu hi a’n dik a nih:
Ama leh ei thi chun,
Ama leh hring ei ta,
12 Ei tuor vè a ni chun,
Ama leh ro rêl ei ta;
Ei hnăwl a ni chun,
Mi hnăwl ve’ng a tih;
13 Ringum naw inla khom,
Ama chu a ringum zing,
Ama le ama a’n hnăwl thei si nawh.
Sinthawtu pom tlâk
14 Hieng thu hi inhriettirin, Pathien hmingin hril la, thu inchua insêl hi bănsan rawh, a trangkaina a um naw a, ngaithlatuhai a sukkhawlo mei mei a nih. 15 Nang chu Pathien lawmzawng mi, mani sin inzàpui lo, thutak indik taka hmang thiemtu ni tum tlat rawh. 16 Tep lo hrila khawvel mihai titi sep chu nghatsan rawh, chuong ang thil chun Pathien ngaisak nawna tieng mi a thruoi deu deu hlak a nih. 17 An thu inchuktir chu pân sie angin a’n dar a; anni laia mi chu Humenai le Filet kha an nih. 18 Thutak an nghatsan a, ‘thonawkna chu a um dai tah’ an ta, mi threnkhat ringna khom an sukphet tah a nih. 19 Pathien thutak lungphûm nghet ruok chu a chăng ve naw a, “Lalpan a mihai a hriet” ti le “Lalpa hming lamtu taphothai chun rîtlona an nghatsan ding a nih” ti ziek a chuong.
20 In ropui taka bûr le bêlhai khom rangkachak le tangkaruoa siem vong a ni naw a, thinga siem dam, pila siem dam khom a um a, a thren thil poimawa hmang ding, a thren ruok chu hmang pawlawt ding a nih. 21 Hieng thil thra naw ka hrilhai laka inthoka inthier fihlim mi chu hmangraw hlu, in Neitupa ta dinga hmang tlâk, sawp fai sâ diem, thil thra tinrêng thawnaa hmang el thei dinga inpei zing ang chu hung ning a tih.
22 Tleirawl chăkna suol chu nghatsan la, lungril thienghlim taka Lalpa lamtuhai leh felna dam, ringna dam, hmangaina dam le inremna dam hnot lem rawh. 23 Hieng insêlna trangkai lo le invêtthlak hi nghatsan rawh, innghirnghona a chok suok mei mei a nih. 24 Lalpa siehlaw chun inhal a chîng ding a ni nawh; tu khom laina mi, thiem tak le dawthei taka zirtir lem mi a ni ding a nih. 25 Ama kaltuhai khom thutak hre thei dingin Pathienin an lungril a’n lamlĕttir thei ti beiseiin, zainêm takin zirtir raw se. 26 Chuonga a thaw chun, Diebolin a nuom zawng inthawtir dinga a chânga a awk an nih ti hung inman suok an ta, intâl suok thei an tih.