2 Pa Pathien le ei Lalpa Krista Isu kuoma inthoka lunginsietna le inremna chu i kuomah um raw se.

3 Ei thlatuhai thaw dan anga sie le thra hrietna fîm taka a rong ka bawl Pathien kuomah lawmthu ka hril. Sŭn le zăna ka trongtrainaah ka hriet zing hlak che. 4 I mitthli tlàk dam kha ka hang suikir a, hlima ka sipna dingin inhmu nawk ka châk ngot el. 5 I ringna takzie thu khom ka lo hriet zui pei a, chu chu i pi Loisiin a nei a, i nu Euniki khomin a nei bok a, nang khomin i nei ve ta pei a nih ti ka hriet. 6 Chu lei chun i chunga kut ka’n nghat laia Pathien thilpêk i dong kha mût chok zing dingin ka hril non che. 7 Pathien chun dawina thlarau a mi pĕk naw a, hrătna le hmangaina le mani inthunun theina thlarau a mi pĕk lem a nih.

8 Chuleiin, ei Lalpa Isu thu hi puong inzak naw la, ama leia lung ina intâng kei khom hi mi’n zàpui bok naw rawh. Pathien hrâtna ringin, Chanchin Thra leia rinum tuor ve inhuom pei lem rawh. 9 Ei thilthaw lei ni loin, ama tum dan le a lunginsietna zar lemin a mi sandam a, thienghlim taka hring dingin a mi ko a nih. Chu lunginsietna chu leilung insieng hma daih khan Krista Isuah a mi lo pĕk tah a; 10 chu chu tu hin Isu Krista a hung inlang khan, suklang a ni chauh a nih. Ama chun thǐna a hnè a, Chanchin Thraa hin hringna le thi thei nawna chu a hung suklang tah a nih. 11 Kei hi chu thu chu tlâng insampui dinga a tirko le zirtirtua ruot ka nih. 12 Chu lei chu annawm hienga ka tuor hi. Sienkhom ka’n zak nawh. Ka ring chu ka hriet a, chu Nia dinga ka’n koltir khom chu vong him tlat a tih ti ka hriet chieng.

13 Ka kuoma inthoka thu i hriet hlak hai kha zirtirna indikah pom tlat la, ringna le hmangainain Krista Isua chun chêng tlat rawh. 14 Nangmaa ro hlu sie le inkoltira um kha einia chêng Thlarau Thienghlim thrangpuinain vong tlat rawh.

15 Asia biela mihai khan, Fugel le Hermogen chenin, an mi zămsan vong tah ti i hriet. 16 Lalpa chun Onesifora hai sŭng lunginsiet raw se. Ama khan a mi sukhlim êm êm a, lung ina intâng ka ni hih a mi’n zàpui nawh. 17 Rom a hung tlung charin a mi hung zong suok ngat ngat a nih. 18 Efesi khuoa khom a mi thrangpui nasatzie i hriet kha. Lalpa chun chu Nia chun a lungsietna indongtir raw se.