3 In ta dinga kan trongtrai zătin Pathien, ei Lalpa Isu Krista Pa kuoma chun lawmthu kan hril hlak. 4 Krista Isu in ringzie le mi thienghlimhai in hmangaizie thu dam kan lo hriet a. 5 Chu chu Chanchin Thra thutak in lo hrieta inthoka beiseina in lo nei tah lei a nih; chu in beisei chu in ta dingin vànah sie khâwl a nih.

6 In kuomah Chanchin Thra thutak a hung tlung a, Pathien lunginsietna chu in hriet chieng nia inthoka nangni laia thil um ang khan khawvel ram tinah Chanchin Thra chun ra insuoin a’n dar tah a. 7 Kan ta^a dinga Krista rongbawltu ringum Epafra, kan rongbawlpui dittak, Chanchin Thra hung hriltu chĕu khan, 8 Thlarau zara hmangaina in nei thu a mi hril a nih.

9 Chu lei chun thlarau tieng varna le hriet thiemna tinrênga a ditzawng in hriet theina dingin, in chanchin kan hriet nia inthokin Pathien kuoma trongtraia hnipêk chĕu kan ma nawh. 10 Lalpa mi ni tlâk a, kong iengkimah ama suklawmtu ni a, thil thra tinrênga ra insuo a, Pathien hrietnaa in hung inthranglien pei theina dingin kan hni bok hlak. 11 A thilthawtheina ropui taka inthoka suok hratna chun kong tinrêngah tuorselna le dawtheina nei dingin sukhrât raw se chêu. 12 A ram ênga mi thienghlimhai le rochan nei ve tlâka siemtu chĕu Pathien kuoma chun hlim takin lawmthu kan hril bok hlak. 13 Ama chun thim thuneinaa inthoka mi san suokin, a hmangai tak, a Naupa rama chun a mi thruoi lŭt tah a. 14 A Naupa chu ei intlanna le ei suolhai ngaidamna a nih.

15 Krista chu hmu thei lo Pathien angpui, thilsiem po po hmathruoitu a nih. 16 Amaa chun iengkim vana um hai, hnuoia um hai, hmu thei le hmu thei nawhai, lalthrungpha hai, rorêlna hai, lalna hai, thuneina hai chu siem a ni a; iengkim hi ama lei le ama ta dinga siem a nih. 17 Ama chu iengkim um hmain a um a, amaa chun iengkim an inthlung khawm vong bok a nih. 18 Ama chu kohran lû a ni a, kohran hi a taksa a ni bok. Ama chu iengkim bul a ni a, iengkima chunghnung tak a ni theina dingin mithi laia inthoka thonawkna hmathruoitu a nih. 19 Amaa Pathien nîna famkim a chĕng chu Pathien ditzawng a nih. 20 Krista leiin iengkim Ama leh a’n remtir nawk a, kraws-a a Naupa thisen chun inremna a siem a, Krista lei chun hnuoia umhai le vàna umhai chu Ama leh inremin a siem tah a nih.

21 Nangni khom khâ hmâ khan chu Pathien lakah mikhuol niin, thil suol in thaw hlak leiin a hmêlma in nih. 22 Tu ruok hin chu, taksa ngei puta Krista a hung thǐna zărah, a hmaa mi thienghlim, hmêlhem lo le soisel boa in um theina dingin, Pathienin Ama leh a’n remtir ta chêu a nih. 23 Chuongchun, ringnaah um zingin, nghet takin ngir unla, Chanchin Thra in hriet leia beiseina in hung nei tah kha intawl hmangsan naw ro. Chanchin Thra chu van hnuoia thilsiem tinrêng kuoma puong a ni tah a, kei Paula hi chu rongbawltu chu ka nih.

24 Nangni leia ka tuornaa hin tu hin ka lawm a nih. Kohran ta dinga Kristan a taksaa a tuor băk kha ka taksain ka la sunzom pei a nih. 25 Pathien thu le a remruot in kuoma kim taka puong dingin Pathienin sin a mi pĕk a, kohran rongbawltuah a mi siem a. 26 Suon po po laka a lo thup kumkhuo hlak thurûk kha, tu hin chu a mi thienghlimhai kuomah a puong tah a. 27 Chuong mihai kuoma chun hnam tin ta dinga a thurûk ropui le hlu tak chu Pathienin Jentelhai kuomah inhriettir a nuom hrim a; chu thurûk chu nangnia um Krista, ropuina in beisei san chu a nih. 28 Ama thu chu kan tlanginsampui a, mi tin el chu Kristaa kan sukpuitling theina dingin kan varna po po hmangin kan keihruoi a, kan inchŭktir hlak a nih. 29 Chu sin chu ka hlen suok theina dingin keimaa nasa taka thok Krista hrătna chu hmangin, inrim takin ka pu trâng trăng a nih.