Paulan Rom khuo a pan
27
1 Italy ram tieng longa fe dan ding an rĕl fel charin Paula le tâng danghai chu Awgasta Sipai Pawl an tia sipai zahotu Julio kutah an sie a. 2 Adramitimaa inthokin tuifinriet kam Asia rama long chawlna khuo umhai sira inzin ding longa chun kan chuong a, kan fe tah a; Makedonia rama Thesalonika khaw mi Aristarka chun a mi zui a. 3 A zinga chun Sidon kan tlung a, Julio chu Paula chungah ngil a nei hle a, a ruolhai kuomah lêng a, a châkkhai lam a phalpĕk a. 4 Chu taka inthoka longa fe peiin, thliin naw tieng a mi baw leiin Kupra thlierkar phĕn, thli inupna tieng kan fe a. 5 Kiliki ram le Pamfuli ram dep tuipui kan khĕl hnungin Lukia rama Mura khuo kan tlung a. 6 Chu taka chun Aleksandra khaw long, Italy pana fe ding chu sipai zahotun a hmu a, chu longa chun a mi’n chuongtir a. 7 Ni tam tak damten kan intawl a, harsa takin Nido khaw zawn kan tlung hrăm a. Thliin a mi dangkir leiin Kret thlierkar phĕn, thli inupna tieng kan hĕl kuol a, Kret thlierkar hmor zum Salmoni an ti chu kan pĕl a. 8 Harsa takin va kam hrŭl kan hrŭt a, hmun pakhat Chawlna Mawi an ti chu kan tlung a, chu chu Lasai khaw bula um a nih.9 Hun kan khawral rawn tah a, Bunghei Huna a pĕl tah hiel a, tuipuia inzin a tri-um tăk leiin Paulan thurâwn a pêk a, 10 an kuomah, “Puhai, tuta ei fe pei chun sietna rapthlâk tak ei tuok ding ti ka hriet a; long le a thuomhnaw phur chauh ni loin longa chuonghai ta ding khoma bohmangna tlung a tih” a ta. 11 Nisienlakhom, sipai zahotu chun Paula thu hril nĕk chun longpu le long neitu thu chu a lâk ta lem a. 12 Thlasik tuorna dingin chu long chawlna chu a remchang naw leiin, fe suok a, Foiniki khuo tlung hrâm a, chu taka thlasik tuor chu mi tam lemin an nuom a. Foiniki khuo hi Kret thlierkara long chawlna pakhat, sim thlang le hmar thlang ngha zawnga um a nih.
Tuipuiah thlipui an tuok
13 Sim thli damten a hung hrang hieu hieu a, an dit ang tak hmuah an inngai a, an thirchakaihai chu an khai suok a, Kret thlierkar kam dep chu hrûtin kan suok a. 14 Nisienlakhom, sawt naw teah, khawmuol tienga inthokin thlipui na tak a hung hrăng ta phut el a, chu thlipui chu Eurokuilob an tih. 15 Thlipui chun long chu a hung nuoi vir nok a, thli tieng nor dinga long lu hang kar her ruol a ni naw leiin kan inthla a, a mi fen a mi fen el ta a. 16 Thlierkâr chîte, Klauda an ti phĕn, thli inupna tieng chun a mi fen lŭt a, harsa takin longlêng chu kan hum thei hrâm a. 17 Longa chun longlêng chu an khài lŭt a, a koi dar nawna dingin hruiin an vêt bur a. Libya ram tieng kam, Sirti trieudupa lĕn lût an inlau leiin long puonzarhai chu an kei hnuoi a. chuongchun a mi fen a mi fen nawk tah a. 18 Thli le tui fawn chun a vawr zing leiin a zinga chun long thuomhnaw phurhai chu an pei suok tran a. 19 Ni thum ni chun anni kut ngeiin long hmangruohai khom an pei suok a.
20 Ni sâwt tak chu nisa le arasihai a’n lang naw a, thli chun nasa takin a mi nuoi zing a, dam hrim kan inbeisei ta nawh. 21 Bu fa loa ni tam tak kan um hnung chun anni lai Paula chu a ngîr a, “Puhai, ka thu kha awiin Kret thlierkara inthok khan suok naw inla chu hieng ang sietna le inhmangna hi ei tuok naw ding a na. 22 Nisienlakhom, tuhin thlamuong taka um dingin ka ngĕn chêu a nih. Nangni lai tu khom thi naw ti niu; long ruok hi chu a sè ding a nih. 23 A tâ ka na, a rong ka bawl hlak Pathien chun vantirko pakhat voizan khan a hung tir a, ka bulah a hung ngìr a, 24 ‘Paula, tri naw, Kaisar hmaah i ngîr ding a nih. Ngai ta, longa i’n zinpuihai kha nangma leiin Pathienin a hum ding a nih’ a hung ti a. 25 Chuleiin, uauhai, thlamuong takin um ro. Pathien ka ring a, a mi hril ang chun tlung ngei a tih. 26 Thlierkâr khaw lâi amanih a mi lĕn suok ding a nih” a ta.
27 Zan sawm le zan lina, thliin Adriatic Tuipuiac a mi lĕn phei zing lai chun longpuhaiin khawmuol khaw lai amanih tlung dingin an inhriet a. 28 Tui inthŭk dan an hang inkhi chun hlam sawmhnia inthûk niin an hriet a, sawt naw te hnunga an hang inkhi nawk chun hlam sawmpangaa inthûk a ni tah a. 29 Lung kawhrot hmuna lên lût an inlau leiin long mei tieng chun thirchakai pali an thlăk a, khaw var kar an nghakhla hle a.
30 Long mihai chun an long chu tlansan an tum rûk leiin long lu tieng chun thirchakai thlăk tum ni âwm takin longlêng chu tuipuia chun an thlăk thla a. 31 Chu phing leh Paula chun sipai zahotu le sipaihai kuoma chun, “Hienghai hi longa an um zing naw chun him thei naw ni hai” a ta. 32 Chuongchun, sipaihai chun longlêng hrui chu an sat tan a, an inlĕn hmangtir tah a.
33 Khaw var ding trĕpin Paula chun longa chuong po po chu bu fa dingin a ngĕn a, “Voisun hi ieng khom fa loa in umna ni sawm le ni lina a ni tah a. 34 Chuleiin, bu fa dingin ka ngĕn chêu a nih, in damna dingin; nangni lai tu khomin sam zai pakhat khom inhmang naw ti niu” a ta. 35 Chuong thu chu a hril zoin bei a lâk a, an rênga hmaa chun Pathien kuomah lawmthu a hril zoin a khoi a, an fak tran tah a. 36 Chuongchun, an rêngin thlamuong takin an făk a. 37 Longa chuong chu kan rêngin zahni sawmsari parukd kan nih. 38 An fàk khop vong hnung chun long sukzăngna dingin an bu phurhai chu tuipuiah an pei suok nawk tah a.
Long koi thu
39 Khuo a hung var chun an hriet ngai lo khawmuol an hmu a, chu taka litengsâwla chun khal lut a, trieuphoa chun long chu innghat an tum a. 40 Chuongchun, thirchakai hruihai chu an sat tan a, tuipuiah an maksan a; chu ruol chun a kar herna khuopnahai chu an sŭt a, hma tieng puonzâr chu thli mût ding zawngin an khăi sang a, trieupho chu an pan a. 41 Nisienlakhom, tui zăng khauh pahni infinnaah kan lŭt a, long chu trieudûpah a vor lut a, long hnår tieng chu sukchăng ruol lo khopin an tauh lŭt ta bur el a, a’n tăng ta tlat a. Long mei tieng chu tuifawnin a a vawr nasat leiin a koi tran tah a.
42 Sipaihai chun tânghai chu that vong an rot a, inhlieu kai dam um an ta, tlân hmang an tih ti an inlău lei a nih. 43 Sipai zahotu chun Paula sanhim a nuom leiin an thil rot chu a khap a, tui inhlieu thiem taphot chu tuipuiah inchawm thla a, khawmuola lo kai hmasa ding le 44 mi dang po po chu thingphĕk chung amani long koi hăr phĕk chung amani chuonga kai dingin thu a pêk a. Chuong ang chun kan rêngin khawmuolah him takin kan kai ta vong a.