Suol sawpfaina
13
1 “Chu ni chun Davida sungkuo le Jerusalema chênghai suolna le tirdakumnahai chu sawp faina dingin tuikhur hongin um a tih.2 “Chu ni chun milim hminghai chu a rama inthokin sukbo ka ta, hriet zing ni ta naw ni hai” ti hi Iengkim LALPA thu suok a nih. “A rama inthokin zawlneihai le thlarau tirdakumhai chu la hmang ka tih. 3 Tu khomin thu an la hril lawk rop a ni chun, a hringtu nu le pahai chun, ‘LALPA hminga khêl i hril leiin i thi ding a nih’ ting an tih. Thu a hril lawk lai ngei chun a hringtu nu le pahai chun sûn hlum an tih.
4 “Chu pha chun zawlnei tinin inlàrna an hmu chu inzàpui tang an ta, mi hlèmna dingin zawlnei korfuol inhmul dem dum hâk ta bok naw ni hai. 5 ‘Zawlnei ka ni nawh. Lo nei mi ka ni a, ka tleirawla inthoka lo sin thawa fak zong hlak mi hrim ka nih’ ting an tih. 6 Chun, miin, “I panga hliemhai kha teh?” tia an indon chun, “Ka ruolhai inah ka changsuola a nih” tiin don a tih.
Berampu that ding
7 Iengkim LALPAN hieng hin a tih:
“Aw kawlhnâm, har rawh,
Ka berampu lakah har rawh,
Ka sangawizawnpui laka chun.
Berampu chu sât hlum la,
Beram ruol indar an ta,
A tehai chungah kut thlâk ka tih.
8 Hmun thuma threa hmun hni chu,
A ram pumah thi hmang an ta,
Hmun thumna chu hlà ning an tih.
9 Anni chu meiah fieng ka ta,
Tangkaruo angin thlit fîm ka ta,
Rangkachak angin fieng ka tih.
Ka hming hung lam tang an ta,
Anni chu lo don ka ta,
‘LALPA chu kan Pathien a nih’
Tiin mi ko ve tang an tih.”