LALPA hungna le rorelna
14
1 Ngai ta, in ralhaiin in thil an lakhai in hmu ngeia an insem hun ding LALPA ni chu a hung hnai mèk a nih. 2 Jerusalem do dingin hnam po po ka ko khawm ding a nih. Khawpui chu lâng an ta, inhai rok ram an ta, nuhmeihai chu suollui an tih. Khawpui mihriem zatve chu salah thruoi hmang an ta, a danghai chu khawpuia inthokin suok naw ni hai.3 Chu pha chun LALPA chu inthok suok a ta, indo chânga a bei hlak angin, chuong hnamhai chu bei a tih. 4 Chu ni chun Jerusalem sak tienga Oliv tlanga chun a ke innghat a ta, a tlâng chu a laiah sak le thlang zawngin inphel a ta, a laiah ruom lien tak hung um a ta, a tlâng tieve chu hmar tieng intawl a ta, a tieve chu sim tieng intawl a tih. 5 Tlâng kâr ruoma chun inbi hmang in ta, ruom chun Azel chen va sun a tih. Judai ram lal Uzia inlal laia lirhninga in tlàn siet ang khan tlân in tih. Chu zoah LALPA ka Pathien chu hung a ta, a mi thienghlim po po khom ama ruol chun hung an tih.
6 Chu ni chun nisa var um naw ni a, dei naw ni a, zil tla bok naw nih. 7 Chu ni chu ni dangdai tak, LALPA chauh hriet, sŭn ni lo, zăn ni bok lo ning a tih. Zan tieng ruok chun var hung um a tih.
8 Chu ni chun Jerusalema inthokin hringna tui hung luong suok a ta, a zatve chu Tuipui Thiah luong lut a ta, a zatve dang chu Mediterranean tuipuiah; chuong ang chun nipui le thlasika khom ning a tih. 9 LALPA chu hnuoi pumpuiah lal ning a ta, chu ni chun LALPA pakhat chauh um a ta, a hming chauh chu hming um sun ning a tih.
10 Ram po po chu Gebaa inthoka Jerusalem sim tienga Rimon chenin Araba ang hung ning a tih. Sienkhom, Jerusalem chu chawi sangin um a ta, Benjamin kotkhar-a inthoka kotkhar pakhatna le a kila kotkhar chen le Hanalel Insang le laltak uoiin sawrna khur chenin a hmun pangngai hluong a tih. 11 Hluo sip an ta, suksiet ni ta naw ni a, Jerusalem chu him tang a tih.
12 Jerusalem dotuhai po po chunga LALPAN hripui a’n lengtir ding chu hi hi a nih: An kea an ngir zing laiin an taksa hmon thlang a ta, an mit khurah an mithai zop ral a ta, an băuah an lei hmon thlang a tih. 13 Chu ni chun chí-âina nasa takin LALPAN mihai chu inmantir a ta, pakhatin pakhat dang kutah man a ta, inbakkei an tih. 14 Juda khomin Jerusalem bei a ta, an sè vèla hnamhai rosum, rangkachak le tangkaruo le silfen tam tak la khâwm a tih. 15 Chu hripui chu sakor hai, sabengtung lien chi hai, sanghawngsei hai, sabengtung chin chi hai le an inkulnaa ran um po pohai chunga khom inlĕngtir a tih.
16 Jerusalem do hlaktu, hnam hrang hrang la dam khawsuokhai chu kum tinin Laltak, Iengkim LALPA chu chawibiek ding le Bawkte Kŭt hmang dingin Jerusalemah hung hlak an tih. 17 Hnuoia hnam tu khom Jerusalema Laltak, Iengkim LALPA chawibiek dinga hang fe naw taphot chun ruotui dong naw ni hai. 18 Aigupta mihai khom chawibieka an hang thrang ve naw chun ruotui dong naw ni hai. Bawkte Kùta hang fe ve lo hnamhai a hremna hripui bok chu an chungah inlĕngtir a tih. 19 Chu chu Aigupta hremna le Bawkte Kùt hmang dinga hang fe ve lo hnamhai po po hremna chu ning a tih.
20 Chu ni chun sakor telnènga hai khom LALPA TA DINGA SER THIENGHLIM ti chuong tang a ta, LALPA ina bûr le bèl po po khom maichàm hmaa ser thieng bûr le bèl angin thienghlim vong tang a tih. 21 Jerusalem le Judai rama bûr le bèl po po chu Iengkim LALPA ta dinga thienghlim ning a ta, hlànbieka fehaiin bûr le bèlhai chu thlai suongna dingin hmang an tih. Chu ni chun Iengkim LALPA inah Kanan mi sumdawngtu um ta naw ni hai.