Jerusalem sansuokna
12
1 Israel chungthua LALPA thu chu: LALPA, vanhai keiphartu, hnuoi nghatsan phûmtu, mihriema thlarau sietu chun hieng hin a hril: 2 “Jerusalem chu a vêla mi po po sukruitu no-ah siem ka ta, Judai ram chu inhuol an ta, Jerusalem khom inhuol an tih. 3 Chu nia ama bei dinga hnuoia hnam po po an pung khawm pha chun Jerusalem chu hnam tu khom sukchăng ruol lo lungpuiah siem ka ta, a tawk chàng tum taphot chu na takin mani inhliem an tih. 4 Chu ni chun sakor tin chu sukthlabâr ka ta, a chunga chuonghai chu chi-ai an tih” ti hi LALPA thu suok a nih. “Juda sungkuo chungah mit inlên zing ka ta, hnam dang sakorhai mit chu sukdel ka tih. 5 Chu pha chun Juda sungkuo tina luhai chun lungrilin, “Jerusalem mipuihai hrătna san chu Iengkim LALPA chu an Pathien a ni lei a nih” la ting an tih.6 Chu pha chun Juda hotuhai chu thinghuon bula meiphu sie ang le bupawl laia meiser chok lai rol ang ning an ta, an kawl le kienga an voi le changa umhai chu kăng hmang a ta, Jerusalem ruok chu a hmun ngaiah him zing a tih. 7 Davida sunghai le Jerusalem ropuina chu Juda sungkuo nĕka a ropui lem nawna dingin, LALPA chun Judahai chĕngna hmun chu san suok hmasa tak a tih. 8 Chu ni chun LALPAN Jerusalema chênghai chu hum a ta, anni laia a ongrop tak khom Davida ang ning a ta, Davida sungkuo chu Pathien ang, an hmaa LALPA vantirko fe ang chu hung ning an tih. 9 Chu ni chun Jerusalem hung beitu hnamhai po po chu sukse dingin inthok suok ka tih” tiin.
Sun hluma um sùnna
10 “Davida sungkuo le Jerusalema chênghai chunga chun lunginsietna le hnina thlarau buok khum ka ta, an sun hlumpa chu en an ta, miin a naupa nei sun a sŭn angin sûn an ta, nau lutir pùrdo anga nain a pûr chu do an tih. 11 Chu ni chun Megido phai Hadad Rimon-a an trap anga nasain Jerusalema khom nasa takin trap an tih. 12 A ramin sûn a ta, Davida sungkuoa pahnam tinin an nuhmeihai leh sûn an ta, Nathan sungkuohai khomin an nuhmeihai leh sûn an tih. 13 Levi sungkuoa pahnam tin le an nuhmeihai le Simei sungkuoa pahnam tin le an nuhmeihaiin sûn an ta, 14 pahnam dang po po le an nuhmeihaiin sûn bok an tih.”
tiin.