4 LALPA ka Pathien chun hieng hin a tih: “That dinga ruot beramhai chu enkol rawh. 5 A’n chawtuhai chun an that a, hrem an ni ngai nawh. A zortuhai chun, ‘LALPA chu inpâkin um raw se, ka hung hausa ta si a’ an ti a. A nih, anni vêngtu berampuhai ngei khomin an lunginsiet nawh. 6 Kei khomin a rama chênghai hi ka lunginsiet zing ta naw ding a nih. Mi tin el chu a tuolbawm kuta le a lal kutah ka pêk suok ding a nih. A ram chu suosăm an ta, an kuta inthokin san suok naw ning” ti hi LALPA thu suok a nih.

7 Chuongchun, ran ruol laia that dinga ruothai, abikin nêksawra umhai chu ka enkol a. Chun, hmol pahnih ka lâk a, pakhat chu “Ditsak’, a dang chu ‘Suikhawm’ tiin ka ko a, chuong chun ran chu ka ching a. 8 Thla khat sungin beram vêngtu pathumhai chu ka sukbohmang a. Ran ruol chun an mi theida a, kei khomin ran ruol chu ka nghok bok a. 9 Chun, an kuomah “Nangni vêngtu ni ta naw ning. A thi dinghai chu thi hai sien, a bohmang ding chu bohmang raw hai se. A thi mahlahai chun an sa infa ton raw se” ka ta.

10 Chun, ka hmol pakhat Ditsak chu ka lâk a, ka tan bong a, hnam po pohai laka ka thuthlung chu ka sût a. 11 Chu nia ka thuthlung ka sût hmutu, nĕksawra um ranhai chun LALPA thu a nih ti an hriet a. 12 Kei chun an kuomah, “Thra in tizawng a ni chun ka hlaw mi pe unla, a ni naw chun nangnin kol el ro” ka ta. Chuongchun, tangkaruo chêng sawmthum an mi pĕk a. 13 Ka man awm tawka an sak chu LALPA chun, “Bêlhemtu hmunah pei rawh” tiin a mi hril a. Tangkaruo chêng sawmthum chu ka lâk a, LALPA ina chun bêlhemtu kuomah ka pêk a. 14 Chuongchun, Juda le Israel inkara inunauna chu suktan dingin ka hmol dang Suikhawm chu ka lâk a, ka tan bong a.

15 LALPA chun ka kuomah, “Berampu invêt hmangruo bok kha hmang nawk el rawh. 16 A ramah berampu dang sie nawk ka ta, ama chun inhmanghai chu ngaisak naw ni a, a têhai zong naw ni a, hliemhai enkol naw ni a, a hriselhai khom chawm naw ni a, a thâu thău sa chu fa ram vong lem a ta, an tin komhai chenin thlong a tih.