LALPAN Juda enkol a tih
10
1 Thrâl ruo sùr hun a tlung pha leh,LALPA kuomah ruo hni hlak ro,
LALPA chu kawl sukphetu a na,
Mihriemhai le thlaihai ta dinga
Ruopui insurtirtu chu a nih.
2 An milimhan khêl an hril a,
Aisanthiemhan khêl an hmu a,
Mang indik lohai an hril a,
Mihai ngai an sukthra thlăwn a.
Chuleiin beram ruol angin,
Mipui an invăk hmang a,
Vêngtu ding an tlasam leiin,
Mi nêksawrin an um si.
3 Berampuhai chunga hin,
Ka lung a sen êm êm a,
An thruoituhai hrem ka tih.
Iengkim LALPAN a beram ruol,
Juda sungkuo chu enkol a ta,
Indo sakor suongum tak angin,
Anni chu hung sukhrât a tih.
4 Juda sungkuoa inthokin,
A bulthrut lungphŭmhai,
Puon in keina thlungphunhai,
Indona thalngulhai,
Rorêltuhai po po khom,
An hung suok ding a ni si.
5 LALPAN a umpui leiin,
Indo laia mi huoisenhan,
Kotthlĕra an hmèlmahai,
Chirhak anga an pal angin,
Sakor chungchuong mihai khom,
Do hronin intlăwm an tih.
6 “Juda sungkuo sukhrat ka ta,
Josefa sungkuo san suok ka tih.
Thruoiin tungding nawk ka tih,
Ka lainat tawl tlat si a.
Hnâwl ngai lo ni âwm hrimin,
An hninahai chu don ka tih,
LALPA an Pathien ka ni si a.
7 Mi hrât khawkhênghai angin,
Efraim chu hung hrât a ta,
Uoiin no dom ang elin,
A lungril chu hlim a tih.
A nauhaiin hmung an ta,
An lungril LALPA chungah
Nasa takin hlim a tih.
8 Faifûkin ko khawm ka ta,
Intlan suok ngei tawl ka ta,
An tam hun lai ang bok khan,
Ka sukpung nawk ding a nih.
9 Hnam tin lai hnot dar lang khom,
Ram hla taka inthok khomin,
Mi la hung hre zing an ta,
An nauhai leh dam khawsuokin,
Hung kir nawk ngĕi ngêi an tih.
10 Aigupta rama inthokin,
Anni chu thruoi kir ka ta,
Asuria rama inthokin,
Anni chu lawr khawm ka tih.
Gilead le Lebanonah
Anni chu hung thruoi ka ta,
Inleng naw hiel hman an tih.
11 Buoina tuipui kân an ta,
Tui insok chu rĕng a ta,
Nile li mong chen kang a tih.
Asuria chapona chu,
Suktlawmin um tâng a ta,
Aigupta lal hmol khom chu,
Sukboin um dai a tih.
12 LALPA-ah sukhrât ka ta,
A hmingin kal chawi an tih”
Ti hi LALPA thu suok a nih.