Israel hmelmahai hremna
9
1 Hadrak ram lakah LALPA thu a rik,Damaska chunga khom tlung a tih.
Mi tin mit le Israelhai mit chu,
LALPA chungah a fu thrup a.
2 Damaska khawpui le inramri,
Hamat chunga khom tlung a ta,
Tura le Sidon chungah tlung a tih,
Varin themthiem hle hai sien khom.
3 Tura chun ama ta dingin,
Kul ropui tak a bawl a,
Pilvut anga tangkaruo bùmin,
Chihrak ang elin kotthlêrah,
Rangkachak a sêk khawm a.
4 Sienkhom a nei po po chu,
Lalpan lakpêk vong a ta,
Tuipuia a hràtna pei a ta,
Meiin a khuo lem hmang a tih.
5 Askelon chun hmuin trìng a ta,
Gaza chu nâ tiin inkon a ta,
Ekron khom chuong ang bokin,
A beiseina hlamzui dĕr a ta,
Gaza chun a lal chân a ta,
Askelon chu rausan an tih.
6 Filistinhai suong Asdod chu,
Ram dang mihan hluong an ta,
Sukbohmangin um a tih.
7 Sa thisen an fakhai chu,
An baua inthokin la suok ka ta,
Sa thieng lo an fakhai khom chu,
An ha kara inthok pot suok ka tih.
Hlaa la um sunhai po chu,
Ka ta hung ni ta’ng an ta,
Judai ramah hotu ni’ng an ta,
Ekron mihai chu Jebuhai ang,
An la hung ni ding a nih.
8 Rûntu lakah ka in vêng ka ta,
Ka vĕng hnunga inthok chu,
Nêksawrtuhan ka mihai,
Hung pal zŭt ta naw ni hai.
Ziona Lal hung ding
9 Nasa takin hlim rawh, Zion naunu!
Jerusalem naunu, khêk rak rawh!
En ta, i kuom tieng i Lal a hung,
Mi fel le Sandamtu chu;
Sienkhom inngaitlawm takin,
Sabengtung chungah a chuong,
Sabengtung tuoi chung ngeiah.
10 Efraim tawlailir la hmang ka ta,
Jerusalema indona sakorhai khom;
Indona thalngul suktliek ka tih.
Hnamhai kuomah inremna thu hril a ta,
Tuipuia inthoka tuipui chenin,
Eufretis a’nthoka hnuoi tawp chenin,
A lalna chun huop vong a tih.
11 Nangma chungthua khom,
Nang le ka thuthlungna thisen leiin,
Tui um lona khura inthokin,
I mi intânghai chu insuong ka tih.
12 Aw, beiseina hruia intûlhai,
In kulpuiah kîr nawk ta ro.
A lêt hniin tungding ka ti cheu ti,
Voisun hin ka puong a nih.
13 Ka thalngul ka kuoi angin,
Juda chu kuoi kûr ka ta,
Efraim chu thalah hmang ka tih.
Aw Zion, Grik nauhai do dingin,
I nauhai chu chok tho ka ta,
Mi hrât kawlhnàmah siem ka tih.
LALPA hung inlang ding
14 An chungah LALPA inlang a ta,
Kâwlphê angin a thal inlep a tih.
Lalpa PATHIEN ngei el chun,
A tawtawrawt hung mût a ta,
Sim thlipui leh inthok suok a tih.
15 Iengkim LALPA chun hum a ta,
Vomvir ringot hmang khomin,
Hmêlma hnein tukdol an ta,
Dawn an ta, uoiin inrui ang elin,
An ri so véng vùng a ta,
Maichàm thèna berbu angin,
Sung sipin um zing an tih.
16 Chu huna chun an LALPA,
An Pathien chun ran ruol angin,
A mipuihai chu san him a ta,
Lallukhuma lunghlu angin,
A ramah var sing seng an tih.
17 Mit an va suktlai awm de!
Buin val ruol chawm hrât a ta,
Uoiin tharin nghaknu lênghai.