3 LALPA chun hieng hin a tih: “Zion-ah kir nawk ka ta, Jerusalemah chêng ka tih. Chu pha chun Jerusalem chu Thudik Khawpui ti ni ta’ng a ta, Iengkim LALPA tlang chu Tlang Thienghlim ti ni bok a tih.”

4 Iengkim LALPA chun hieng hin a tih: “Jerusalem kotthlĕra hai chun tar kûna dam nuhmei pasal, an kum tam tak leia hmol thruna lêng le inthrung hung um nawk tang an tih. 5 Khawpui kotthlĕra hai chun tlanglakte ruol inhnelin infiem nuoi nuoi nawk ta bok an tih.”

6 Iengkim LALPA chun hieng hin a tih: “Chu huna chun hieng hlaa la um sunhai ta ding chun mak hle angin inlang a ta, sienkhom ka ta dingin a mak ve ding maw?” ti hi Iengkim LALPA thu suok chu a nih.

7 Iengkim LALPA chun hieng hin a tih: “Sak ram le thlang rama ka mihai chu san suok ka tih. 8 Jerusalemah thruoi kir nawk tawl ka ta, ka mihai ning an ta, kei an Pathien ning ka ta, an chungah ringumin fel ka tih” tiin.

9 Iengkim LALPA chun hieng hin a tih: “Nangni, Iengkim LALPA tempul lungphùm an phùm nia zawlnei baua inthoka hieng thuhai lo hretuhai, tempul chu in bawl theina dingin in kut sukhrâtin um raw se. 10 Kha hma khan mihriem le ran ta dingin inhlawna a um ngai naw a, hmêlma leiin tu khomin muong takin sum an lam thei nawh, mi tin chu a tuolbawm leh ka’n dotir si a. 11 Tu ruok hin chu hlaa la umhai hi kha hmaa ka thaw ang khan thaw ta naw ningah” ti hi Iengkim LALPA thu suok a nih.

12 “Muong takin thlai chi thlak in ta, grep hruihai chun ra insuong an ta, hnuoiin bu le bâl tharsuok a ta, vanin daidaw intlâktir a tih. Chuonghai chu hlaa la um sun mipuihai ta dingin rochanah peng ka tih. 13 Aw Juda sungkuo le Israel sungkuohai, hnam danghai trongsie phurtu lo ni hlak inla khom san suok ka ti cheu a, malsawmna hung ni tâng in tih. Tri naw unla, in kut sukhrâtin um raw se.”

14 Iengkim LALPA chun hieng hin a tih: “In thlatuhaiin an mi suklungsen leia lainatna thrang loa in chunga sietna intlungtir dinga ka ti tlat ang khan, 15 tu ruok hin chu a letlingin Jerusalem le Juda sungkuo chungah thil thra thaw ka tum tlat tah thung a nih. Chuleiin, tri naw ro. 16 Hieng hi in thaw ding chu a nih: Mi tinin mani tuolbawm seng kuomah thudik tak hril unla, ro indik tak le inlai takin rêl unla, 17 in tuolbawmhai sietna ding phierruk naw unla, thu khêla inkhàm chîng naw ro. Hieng thil hi ka theida a nih” ti hi Iengkim LALPA thu suok a nih.

18 Chun, Iengkim LALPA thu chu ka kuomah a hung tlung nawk a. 19 Iengkim LALPA chun hieng hin a tih: “Thla linaa in bu nghei le thla nganaa in bu nghei le thla sarinaa in bu nghei le thla sawmnaa in bu nghei hlakhai chu Juda sungkuo ta dinga hlimna le lawmna hun, kût hlimumah inchang tàng a tih. Chuleiin, thudik le inremna chu zong ro” tiin .

20 Iengkim LALPA chun hieng hin a tih: “Hnam tam tak le khawpuia chêng mi tam tak an la hung ding a nih. 21 Khawpui pakhata chênghai chu khawpui dangah feng an ta, ‘Thaw ro, Iengkim LALPA ditsakna chu ngĕna dawvan kai dingin fe nghâl ei tiu. Keini khom kan fe ve ding a nih’ tiin infiel tuong an tih. 22 Mi tam tak le hnam ropui tak takhai chu Iengkim LALPA zong ding le a hmaa dawvan kai dingin Jerusalemah hung an tih” tiin.

23 Iengkim LALPA chun hieng hin a tih: “Chu huna chun hnam hrang le trong hrang hrang hmang mi sawmin Juda mi pakhat kor fuolah chelin intûl tlat an ta, ‘I kuomah Pathien a um ti kan hriet leiin i ruolin kan hung ve ding a nih’ la ting an tih” tiin.