Lekhabu ziel vuong
5
1 Ka hang ngha nawk a, ka hmaa chun lekhabu ziel vuong duoi duoi hi ka hmu a. 2 Ama chun, “Iem i hmu a?” a ta, kei chun, “Lekhabu ziel vuong duoi duoi lai ka hmu a, a dung meter kuo le a khang meter li le a chenve vel a nih” tiin ka don a. 3 Ama chun, “Hi hi a ram pum chunga trongsie thon suok mek chu a nih. A phêk hma tienga inziek angin rukru taphot chu a rama inthoka hnot suok ning an ta, a phek hnung tienga inziek angin khêla inkhâm taphot chu a rama inthoka hnot suok ni bok an tih. 4 Trongsie chu infesuoktir ka ta, rûkruhai ina le khêla ka hminga inkhâm taphot inah lût a ta, an in sungah um zing a ta, ina lung le thinghai chu sukse vong a tih’ ti hi Iengkim LALPA thu suok a nih” tiin.Bawm sunga nuhmei
5 Mi betu vantirko khan a mi hung pan a, ka kuomah, “Hang ngha la, thil hung inlang ding chu en rawh” a ta. 6 Kei chun, “Ieng thil am a na?” ka ta, ama chun, “Inkhina bawm fe suok tah kha a na, a ram pum rîtlona chu a nih” a ta. 7 Chu bawm sìn, suona siem chu a hong a, bawm sunga chun nuhmei pakhat a’n thrung a. 8 Ama chun, “Hi hi Suolbŭr a nih” a ta, nuhmei chu bawma chun a nam lŭt nawk a, suon sǐn chun a sǐn khum a. 9 Chun, ka hang en nawk a, nuhmei pahni ka hmu a, an thla vé vèa chun thlî an păi a, an thla chu kànghlâi thla ang a na, bawm chu van le hnuoi inkarah an vuongpui a.