Khawnvar siena
4
1 Mi betu vantirko kha a hung nawk a, mi in lai not har ang elin a mi hung kei har a. 2 “Iem i hmu a?” a ta. Kei chun, “Rangkachak sakhata siem khawnvar siena, thruom sari nei, a fong tin sîpa hriek bawm le khawnvar phita nei seng ka hmu a. 3 Khawnvar siena sirah oliv kung pahnih a um a, a chang tieng pakhat, a voi tieng pakhat” tiin ka don a. 4 Mi betu vantirko kuoma chun, “Pu, hieng hi ieng am a ni leh?” ka ta. 5 Ama chun, “Hieng hi iem a nih ti i hriet nawa maw?” a ta. Kei chun, “Pu ka hriet nawh” ka ta.6 Chu phing leh ama chun, “Hi hi Zerubabel kuoma LALPA thu chu a nih: ‘I hratna ni loin, i thilthawtheina ni bok loin, ka Thlarau lei lemin thaw ning a tih’ ti hi Iengkim LALPA thu suok a nih. 7 Aw nang dâltu tlâng lien, ieng am i ni hrim leh? Zerubabel chun rawt zawl a ti che a, tempul bawl zoa a lung rem nuhnung tak an pha hunah, mipuiin, “A va mawi ngei de! A va mawi ngei de!” tiin khêk dur dur an tih.
8 LALPA thu chu ka kuomah a hung tlung a, 9 “Zerubabel chun hi tempul lungphŭm hi a kut ngeiin a lo phûm tah a, ama kut ngeiin bawl zo a tih. Chu pha chun Iengkim LALPA chun nangni kuoma hin a mi tir a nih ti hung hre tang in tih. 10 Thaw kuok in la nei naw lai khan an hmusit hlak cheu an naw? Mihaiin Zerubabel kuta inkhina dar mûm a chawi an hmu pha ruok chu nasa takin hlim an tih. Chun, hieng khawnvar pasarihai hi LALPA mit aiawa ngîr an na, hnuoi pumpui hi an hmu vong a nih” a ta.
11 Vantirko kuoma chun, “Khawnvar siena sîr ve vea oliv kunghai hi teh, iem a na a umzie?” ka ta. 12 Chu bâkah, “Rangkachaka siem, hriek thlit suokna khei pahnihai bâkah oliv kau pahnihai umzie khom hi teh?” tiin kan don bok a. 13 Ama chun, “Hieng hi i hriet nawa maw?” a ta, kei chun, “Pu, ka hriet nawh” ka ta. 14 Ama chun, “Hienghai pahni hi hnuoi pumpuia LALPA rong bawl dinga hriek nàlhai chu an nih” a ta.