5 Vantirko chun, “Hienghai hi van thli pali, hnuoi pumpuia Lalpa hmaa ngîr le chu taka inthoka fe suok hlakhai chu an nih. 6 Sakor senhai chu sak tienga fe ding an na, a dumhai chu hmar tieng, a vârhai chu thlang tieng, a rânghai chu sim tieng” a ta.

7 Sakor hrathai chu an hung inper suok trek trek a, khawvel pumpui hrut suok châkin an tha a’n za zok zok a. Ama chun, “Fe unla, khawvel fang suok ro” a ta, chuong ang chun an fang suok a. 8 Chun, ama chun a mi hung ko khĕk a, “En ta, hmar tienga fehai khan hmar tieng rama chuh ka Thlarau an sukhadam a nih” tiin a mi hung hril a.

9 LALPA thu chu ka kuomah a hung tlung a: 10 “Babulona inthoka saltang hung kir Heldai le Tobija le Jedaia haia inthokin tangkaruo le rangkachak thilpêk la khawm la, chu ni lâ là chun Zefania naupa Josia inah fe rawh. 11 Tangkaruo le rangkachak chun lallukhum siem la, chu chu thiempu laltak, Jehozadak naupa Josua inkhumtir rawh. 12 Chun, a kuomah hieng hin hril rawh: Iengkim LALPA chun hieng hin a tih: ‘Hi mi hi a nih a hming Kâu chuh; a hmuna inthokin hung inkàu dar a ta, LALPA tempul bawl a tih. 13 Ama ngei hi a nih LALPA tempul bawltu ding chu; ropui takin inthuom a ta, a lalthrungphaa thrungin ro rêl a tih. A chang tieng chun thiempu inthrung a ta, inrem takin um an tih. 14 Heldai hai, Tobija hai, Jedaia hai le Zefania naupa Hen (Helem) hai hriet zingnain lallukhum chu LALPA tempulah sieng an tih. 15 Hla taka mihai khom LALPA tempul bawla thrang dingin hung an ta, chu pha chun nangni lai hin Iengkim LALPAN a mi tir a nih ti hung hre tang in tih. LALPA in Pathien thu chu taima taka in zawm phot chun hieng thu hi la hung tlung ngei a tih’ a tih tiin hril rawh” a ta.