Thiempu laltak hmun
3
1 LALPA vantirko hmaa thiempu laltak Josua ngir lai chu inlàrna dangah LALPAN a mi’n hmutir a, a chang tienga ama khingtu ding Setan ngir khom chu ka hmu bok a. 2 LALPA chun Setan kuomah, “Setan, LALPA chun a kâwk che! Jerusalem thlangtu LALPA chun a hal che! Hi mi hi meia inthoka thingthu hring kei dok ang chauh a ni naw am a ni?” a ta.3 Josua chu thuomhnaw trop tak leh vantirko hmaa chun a ngîr a. 4 Vantirko chun a bula ngirhai kuomah, “A thuomhnaw bal kha hlippek ro” a ta. Josua kuoma chun, “En rawh, i suolna ka lâk hmangpĕk ta che a, thuomhnaw thra takin ka’n thuomtir ta ding che a nih” a ta.
5 Kei chun, “Lukawm fai inkawmtir ro” ka ta. LALPA vantirko ngir zing chun lukawm thar a’n kawmtir a, silfen fai an inhăktir bok a. 6 LALPA vantirko chun Josua kuomah mawphurna pein, 7 “Hi hi Iengkim LALPA hril chu a nih: ‘Ka lampui i hraw a, ka ti ang peia i thaw chun ka insŭng rêlbawltu ning i ta, ka rorêlna hmun enkol i ta, hi taka ngirhai lai hin ngirhmun chang vĕng i tih.
8 “Aw Josua, thiempu laltak, nang le i hmaa inthrunghai khom khan, thil tlung ding inentir lawknahai, lo ngaithla ro: ka siehlaw, Kâu chu ka hung insuo ding a nih. 9 En ta u, Josua hmaa lung ka phun saw! Saw lunga son mit pasari a um a, a chungah thil inkertir ka ta, hi rama suolna hi ni khat thilthuin la hmang vong ka tih” ti hi Iengkim LALPA thu suok a nih. 10 Chu nia chun mi tinin mani grep buk hnuoi le theichang buk hnuoia inthrung tlâng dingin an tuolbawmhai seng fiel tang an tih’ ti hi Iengkim LALPA thu suok a nih” tiin.