Inkhìna hrui chawi
2
1 Ka hang en a, ka hmaa chun mi pakhat, a kuta inkhìna hrui chawi hi ka hmu a. 2 “Khaw laia fe ding am i na?” tiin ka’n don a. Ama chun, “Jerusalem dung le khang lienzie hriet tuma inkhì dinga hung ka nih” a ta.3 Chuongchun, mi betu vantirko chu a fe a, ama hmu dingin vantirko dang a hung a. 4 Ama chun a kuomah, “Tlân la, saw tlangval kuoma son, ‘Jerusalem hi mi tam tak le ran ruol tam tak chèngna ding a ni leiin huondai nei lo khawpui ning a tih. 5 Keima ngei hin mei bangin inhuon ka ta, a sunga a ropuina chu keima hi ning ka tih, LALPA chun a tih’ tiin hril rawh” a ta.
Saltànghai kir dinga hrilna
6 LALPA chun, “Kawl kil lia thli kuo chen dâpin ka sukdar ta cheua chu tu hin hung suok ta ro, hung suok ta ro, hmar rama inthokin tlân suok ro! 7 Aw Zion nauhai, suok ro! Babulon naunu kuoma chênghai, inrel suok ro” tiin a mihai chu a hril a.
8 A mi chawimawi hnung le nangni roktu hnamhai lai a mi tir hnung hin, Iengkim LALPA chun anni chungthu chu hieng hin a tih: “Nangni dotu taphot chun ka mit naulêng an tawk ang a nih. 9 Chuonghai chunga chun kut inlet ka ta, hmet nawi ka ta, anni salhai ngeiin rok lêt ve thung an tih. Chu pha chun Iengkim LALPA chun a mi tir a nih ti hung hre tang in tih.
10 “Aw Zion naunu, hlimin khek rawh. Ngai ta, ka hung mêk a, i kuomah ka chêng ding a nih” ti hi LALPA thu suok a nih. 11 Chu huna chun hnam tam takin LALPA hung zui veng an ta, a mihai ni tang an ta, anni lai chêng a ta, chu pha chun Iengkim LALPA chun in kuomah a mi tir a nih ti hung hre tang in tih. 12 Judai ram chu ram thienghlima LALPA rochung ram hung ning a ta, Jerusalem chu a khawpui dittak hung ni nawk tang a tih. 13 Mi po pohai, LALPA hmaa chun to thriep ro, a hmun thienghlima inthokin ama thuin a hung inthok suok ta si a.”