ZEKARIA
LALPA kuoma kir dinga kona
1
1 Lal Daria inlala inthoka kum hnina,a thla rietna, favang laihawl lai chun Ido naupa Berekia, chu naupa Zekaria kuomah LALPA thu a hung tlung a: 2 “In thlatuhai chunga khan LALPA lung a awi naw hle a. 3 Chuleiin, mihai kuomah hril la, Iengkim LALPA chun hieng hin a tih: ‘Ka kuom tieng hung ngha nawk unla, kei khom in kuom tieng hung ngha’ng ka tih. 4 In thlatuhai ang khan um ve naw ro. An chungthu khom zawlneiin hieng ang hin a hril a ni kha: Hieng hin Iengkim LALPA chun a tih: ‘In um dan suolhai nghatsan unla, in thil chǐng thra nawhai bànsan ro’ tiin. Sienkhom, an mi bengkhon naw a, an mi ŭksak bok nawh, tiin LALPA chun a hril. 5 In thlatuhai kha khaw lai am an um zo ta a? An zawlneihai khom kha, kumkhuoin an dam a ni? 6 Ka siehlaw zawlneihai kuoma thucha le thuruot ka pĕkhai khan in thlatuhai chu a nangching tawl an naw maw? Chu zoah an sim a, ‘Iengkim LALPA chun ei um dan le ei thilthaw dan angin, ei phu ang peiin ei chungah a thaw a nih’ an ti a ni kha” tiin.Inlarnaah sakor a hmuh
7 Chun, Daria inlala inthoka kum hnina, thla sawmpakhatna, ni sawmhni palina, Sebat thlaab chun Ido naupa Berekia, chu naupa Zekaria kuomah LALPA thu a hung tlung a. 8 Zàna chun inlàrna ka hmu a. Ka hmaa chun mi pakhat sakor sen chunga chuong a lo um a, ruoma inhmûi thing bil lai chun a ngîr a. A hnung tieng chun sakor sen dam, a sen-uk dam le a var dam an um a. 9 Kei chun, “Ka lalpa, hienghai hi tuhai am an na?” tiin ka’n don a. A mi betu vantirko chun, “Ieng am an nih ti inentir ka ti che” a ta. 10 Chu phing leh inhmûi thing laia ngir chun, “Hienghai hi hnuoi pumpui fang suok dinga LALPAN a tirhai chu an nih” tiin a mi hril a. 11 Anni chun inhmûi thing hnuoia ngir vantirko kuoma chun, “Hnuoi kan fang suok vong ta a, hnuoi pumpui chu hadam tak le inrem taka um niin kan hmuh” tiin an hril a.
12 Chu phing leh vantirko chun, “Iengkim LALPA, Jerusalem le Judai rama khuohai chungah kum sawmsari zet i lung a sen ta a, ieng chen am i zangaina kut i la chel tîm ding a na?” a ta. 13 Mi betu vantirko kuoma chun LALPAN thu zaidam tak le thlamuongum tak a hril a. 14 Mi betu vantirko chun ka kuomah, “Hi thu hi puong rawh: Iengkim LALPA chun hieng hin a tih: ‘Jerusalem le Zion laka hin ka thîkthu a se hle a, 15 him hle anga inngai hnamhai chunga ruok hin chu ka lung a sen hlê thung a nih. Ka lung a sen met chauh kha anni hin sietna tlung hiel khopin an belsa a nih. 16 Chuleiin, zangaina leh Jerusalem tieng kir nawk ka ta, chutaka chun ka in chu indin thar nawk ning a ta, ka’n khîna hrui chu Jerusalem chunga chun zam ka tih’ ti hi Iengkim LALPA thu suok a nih.
17 “Hi khom hi puong sa bok rawh: Iengkim LALPA chun hieng hin a tih: “Ka khawpuihai chu hmuingilnain sip liem nawk a ta, LALPA chun Zion chu thlamuon nawk a ta, Jerusalem chu thlang nawk a tih” tiin.
Ki li le thirsu pali
18 Chun, ka hang en a, ka hmaa chun ki pali ka hmu a. 19 Mi betu vantirko kuoma chun, “Hienghai hi iem an na?” ka ta. Ama chun, “Hieng kihai hi Juda mihai, Israel mihai le Jerusalem phìn dartuhai an nih” a ta.
20 Chu zoah LALPAN thîrsu pali a mi’n hmutir a. 21 Kei chun, “Hienghai hi ieng thaw dinga hung am an na?” ka ta. Ama chun, “Kihai hi Judahai phìn dartu an na, sienkhom tu khom a khing ngam an um naw a. Hieng thîrsuhai hi a hâwl zâmtu ding le Judai ram hung bei a, a mi chênghai phìn dar dinga lu hung lei hnam taphothai ki chu vaw tlam dinga hung an ni hih” a ta.