Sim dinga ngĕnna
2
1 Aw nangni hnam zakmawhai,Inko khawmin pung khawm ro,
2 A hun ruot a tlung hmâ hin,
Busî anga lĕn hmang in ni hmâ,
LALPA lungsenna ni le,
A lunginlingna ni chu,
In chunga a tlung hmâ hin.
3 A thupêk anga thaw hlaktu,
A rama mi thuhnuoirolhai,
LALPA chu zong unla,
Indik takin thil thaw unla,
Thuhnuoirol takin um ro,
LALPA lungsenna niah,
Hum in ni thei tâkduoiin.
Filistinhai chungthu
4 Gaza chu maksanin um a ta,
Askelon chu sukramin um a tih.
Asdod chu sŭnah inruok an ta,
Ekron chu phawi hmang an tih.
5 Tuipui kama chêng Keret mihai,
In chung a va hang pik de aw!
Filistin rama um aw Kananhai,
“Hluotu boin sukram ka ti cheu”
Tiin LALPA chun a hril.
6 Tuipui kam rama um,
Keret-hai chengna hmun chu,
Berampuhai bŭk khuorna le
Beram huongah inchang a tih.
7 Hlaa la um Juda sungkuoin,
Chu hmun chu nei tâng an ta,
Beram ruol intlattir an ta,
Askelona an in rausanhai chu,
Zanah rieknan hmang an ta,
LALPA Pathienin enkol a ta,
An saltangna hmuna inthokin
Anni tungding nawk a tih.
Moab le Amon chungthu
8 “Moab-hai deusawna ri ka hriet,
Amon mihai ti-elna rihai khom;
Ka mihai an deusaw a,
An ram lăkpĕk tumin an vauh.
9 Moab ram chu Sodom angin,
Amonhai ram chu Gomorra angin,
Zakthlai bil le chi khur umna,
Kumkhaw rausan inchang a tih.
Iengkim LALPA, Israel Pathien,
Pathien hring zing chun a hril:
“Hlaa um ka mihan rok an ta,
Ka hnam, la dam khawsuokhan,
An ram chu neipek an tih” tiin.
10 Chu chu an chapo man a nih,
Iengkim LALPA mihai hmusita,
Nuizatbûra an hmang leiin.
11 An pathienhai a suksiet pha,
LALPA râpumzie hrieng an ta,
Vakam rama chêng hnamhaiin,
An ram sengah chawibiek an tih.
Ethiopia chungthu
12 “Nangni Ethiopia mihai khom,
Ka kawlhnâma that ning in tih”
Tiin LALPA chun a hril.
Asuriahai chungthu
13 A kut hmar tieng inlet a ta,
Asuria chu suksieng a ta,
Ninevi sukram dĕr a ta,
Thlalĕr angin trâwl hawp a tih.
14 Beram ruol le bawng ruolhai,
A sungah bok khawm an ta,
Ramsa tinreng riek khawm an tih.
Thlaler simbuk le chingpirinuhan,
A ban sǐpah bû sep an ta,
Tukvera hai inhràm an ta,
Kot bul hmunhnokin sip a ta,
A sidar tlungpŭm dâwk a tih.
15 Hi hi khawpui insukthawveng,
Muong taka um hlak kha a nih.
“Kei chauh hi ka nih,
Mi sîng zo hrim an um nawh”
A ti lungril hlak si a.
A va hang tlu ram nasa ngei de!
Ramsahan rieknan an hmang a,
A fe pĕl phot chun diriemin,
Kut thinin an inchek khum.