3
1 Jerusalem chan dingInpawngnêkna khawpui,
Hel hmang le tirdakum chu,
A chung a va hang pik de!
2 Tu thû khom a ngai naw a,
Tu zil khom a poisa nawh.
LALPA a ring nuom naw a,
Pathien a hnaih nuom bok nawh.
3 A sunga a milienhai chu,
Sakeibaknei inrûm ang an na,
A sunga rorêltuhai khom,
Zan tieng satene ang an na,
A tûka ding hlà an nei nawh.
4 A zawlneihai an chapo a,
Dawhaa mi hlèm an hmang a,
A thiempuhan tempul sunga
Thil thienghlimhai sukporchein,
An nuom a ningin dan an palzŭt.
5 A sunga um LALPA chu a fel a,
Thil indik lo a thaw ngai nawh.
Tûk tin fel takin ro a rĕl a,
Ni tin thrul tik a nei ngai nawh.
Sienkhom mi fel lohai ruok chun,
Inzak nachâng an hriet nawh.
6 “Hnamhai chu ka nuoi bo a,
An kulpuihai ka sukchim a,
Tu khom hraw thei lo dingin,
An kotthlĕrhai ka sukram a.
Tu khom chĕng thei lona din,
An khawpuihai ka suksiet vong.
7 Khawpui kuoma chun keiman,
‘Nangin mi hang trì phot la,
Ka zilna che hi poisa la,
I chĕngnaa inthok hin,
Săt thlâk ni naw ti ni a,
Ka hremnahai po po khom,
I chungah tlung naw nih’ ka ta;
Sienkhom thil indik lo thaw,
An inhawk pei lem tlat si!
8 Chuleiin kei hi hrepuitua,
Ka ngir ni chen mi nghak ro.
Hnamhai la ko khawm ka ta,
Lalramhai kei khawm ka ta
An chunga ka lungsenna,
Ka lung inlingna po pohai,
Ka la bun thlak ding a na,
Ka thǐkna lungsen chok chun,
A ram pum kang hmang a tih”
Ti hi LALPA thusuok a nih.
9 “Chu pha chun mipuihaiin,
LALPA hming thienghlim lama,
A rong an bawl theina dingin,
Hmŭr thienghlim inputtir ka tih.
10 Mi chawibiektu, ka mihai,
Nile khêla umhai khomin,
Thilpêk hung inhlàn an tih.
11 Chu ni chun ka chunga poi,
In tawkna po pohai lei khan,
In hmai mâwk ta naw ni a;
Hi khawpuia inthok hin,
Mi chapohai po po chu,
Lo hnot suok vong ta’ng ka ta,
Ka tlâng thienghlimah tu khom,
Mi uongthuong um ta naw nih.
12 Zaidam le inngaitlawmhai,
LALPA hming ringtuhai chu,
I sûngah maksan ka tih.
13 Hlaa um sun Israelhai chun,
Poi tâwk ta ngai naw ni a,
Khêl hril ta naw ni hai a,
An băuah khêl suok naw nih.
Fain zâl hadam an ta,
Tu khomin suktri ta naw nih.”
Lawmna hla
14 Zion naunu, zai hla rem rawh,
Aw Israel, inring takin sak rawh!
Aw Jerusalem naunu,
Lungril po poa hlimin lawm rawh!
15 LALPAN i hremna la kiengin,
I hmêlma a hnot kìr tah.
LALPA ngei, Israel Lal chu,
Nangma kuomah a um a,
Suknata um hrim hrim chu,
Inlâu ta ngai nawng i tih.
16 Chu ni chun Jerusalem kuomah,
“Tri naw rawh, aw Zion,
I bân khai tlep el naw rawh.
17 LALPA i Pathienin a umpui che.
Ropui taka sandamtu a nih.
Nasa takin lawm a ti che a,
A hmangainan dawi ang domin,
Hlimna hlain inawi a ti che.”
18 Kût huna in beidongnahai,
La kiengpek daih ka ti cheu:
In phurrik, sukzaktu cheu a nih.
19 A nêksawrtu cheu taphot chu,
Chu pha chun keiman bei ka tih.
Kebaihai chu san suok ka ta,
Tlân darhai chu ko khawm ka ta,
An muolphona ram po poah,
Mi inpăk le inzàin siem ka tih.
20 Chu huna chun thruoi khâwmin,
In tieng thruoi kîr ka ti cheu.
In saltangna hmuna inthoka,
In mithmua ngei tungdinga,
Ka thruoi kir nawk pha cheu chun,
Hnuoi chunga mi po pohai lai,
Chawimawina le inpakna hai,
Ka’n khumtir ding cheu a nih”
Tiin LALPA chun a hril.