ZEFANIA
LALPA rorĕlna
1
1 Juda lal Amon naupa Josia inlal laiin Hezekia naupa Amaria, chu naupa Gedalia, chu naupa Kusi le chu naupa Zefania kuomah LALPA thu chu a hung tlung a.2 “Hnuoi chunga inthokin iengkim,
ti hi LALPA thu suok a nih.
3 “Mihriem le sahai sukbo ka ta,
Chunglĕng vatehai sukbo ka ta,
Tuipuia ngahai sukbo ka ta,
Hnuoi chunga inthoka mihriem,
Ka nuoi bo ni a tlung pha chun,
Mi rilohai chan ve ding chu,
Hmunhnok ringot ning a tih”
Ti hi LALPA thu suok a nih.
4 Judahai chungah kut inlet ka ta,
Jerusalema chenghai chunga khom.
Hi hmuna Baal milim la um po po,
A rêngin sukbohmang ka ta,
An milim biek dang po po khom,
Thiempuhai chopin sukbo ka tih.
LALPA betua inhril si a,
5 In chung zawla inthoka,
Vàn lêngruol bea kûn hlak,
Molek khom be hlak sihai chu,
An rêngin sukbohmang ka tih.
6 LALPA zui loa nghatsantuhai,
Zong lo le ngaiven lohai chu,
An rêngin sukbohmang ka tih.
7 Lalpa PATHIEN hmaa chun,
To trok trokin um ro khai,
LALPA ni chu a hnai ta si a.
LALPAN hlànbiekna a buotsai a,
A fielhai a’n hlàn thienghlim tah.
8 LALPA hlànbiekna nia chun,
Hotuhai le lal nauhai băkah,
Ram dang thuoma incheihai,
An rêngin hrem tawl ka tih.
9 Kot bul inchawm kăntuhai,a
Inpawngnêkna le inhlĕmnaa,
An tempul suksiptuhai chu,
An rêngin hrem tawl ka tih.
10 “Chu ni chun Nga Kotkharah,
Trap khêk ri hung suok a ta,
Vêng tharah trap khêk an ta,
Muol chim ri hum hum a tih,”
Ti hi LALPA thu suok a nih.
11 Bazar vênga chênghai, trap ro,
Dawrkaihai thi vong an ta,
Tangkaruo zortuhai se vong an tih.
12 Chu pha chun khawnvar sitin,
Jerusalem dap suok ka ta,
‘LALPAN a sie a thrain,
Ieng mi law naw nih’ ti a,
Uoiin penga a neng la um anga,
Um mei meihai chu hrem ka tih.
13 An rosumhai rokpêk an ta,
An inhai thriekpĕk an tih.
In bâwl an ta, hluo naw ni hai,
Grep huonhai siem an ta,
A uoiin dawn naw ni hai.
LALPA ni ropui
14 “LALPA ni ropui a hnâi ta a,
A hnâi ta hle a, tlung vak a tih.
Ngai ro! LALPA nia trap ri chu,
Nasa takin inring a ta,
Mi huoisenhai chen khêk an tih.
15 Chu ni chu lungsenna ni,
Beidongna le lungzingna ni,
Buoina ni le siet tuokna ni,
Inthim ni le khaw innim ni,
Sûm le thim sà mup bawm ni,
16 Khawpui kulhai bei ding le
Khaw kil kulbinghai la dinga,
Tawtawrawt mut ruoi ruoi a,
Ral tawn dinga an inko ni a nih.
17 LALPA laka an suol leiin,
Mipui chu phêk buoi an ta,
Mitdel angin inmai an tih.
Vut angin an thisen pei an ta,
An rǐlhai chu hmunhnok angin.
18 LALPA lungsen nia chun,
An tangkaruo le rangkachakin,
Intlan suok thei naw ni hai.
A thǐkna lungsen chok chun,
Ram pum la kâng hmang a ta,
Hnuoia chênghai po po chu,
La sukbohmang rup a tih.”