LALPAN Israel a khing
6
1 LALPA hril hi ngaithla ro:“Ngir la, tlânghai hmaa thiem thu hril la,
Muolhaiin i hril ngaithla raw se.
2 LALPAN a khingna cheu hi,
Aw tlânghai lo ngaithla ro;
Hnuoia tlâng hlunhai, ngai ro,
LALPAN a mihai a khing a,
Israelhai a khing a ni hi.
3 “Ka mihai, nangni chungah,
Ieng am ka thaw hrim a na?
Iengtin am in phur ka sukrik a?
Mi hang don ve ta u, khai;
4 Aiguptaa inthok thruoi suokin,
Bawia inthokin ka’n tlan suok chêu a,
Thruoitu ding Mosie ka hung tir a,
Aron le Miriam ka pek sa bok cheu.
5 LALPA thil fel thawhai chu,
Ka mihai, in hriet zing theina dingin,
Moab lal Balak thurawn pĕk,
Beor naupa Balaamin a don dàn kha,
Theinghil ngai hrim hrim naw ro.
Sitim a’nthoka Gilgal chena,
Thil um danhai kha hre zing ro.”
6 LALPA hmaah inlang ding le
Pathien inzaum hmaa ngir dingin,
Ieng le am ka hung ding a na?
Pumraw thilhlâna inhlàn dingin,
Bawng tuoi kum khat mi ka hung kei ding?
7 Beramchal a sang ruola tiem,
Oliv hriek vadung singkhatin,
LALPA ka suklawm thei ding?
Ka bawsiet ngaidamna dingin,
Ka nau lutir chu inhlànin,
Ka thlarau suolna leiin,
Ka rîla ra chu ka’n hlàn ding?
8 Aw mihriem, ieng am thil thra chu,
Aman a hril dĕr ta chè kha.
Iem a na LALPA phŭt chê chu?
Indik taka thaw, zangaina ngaihlut,
I Pathien le thuhnuoirol taka intlon,
A ni lem naw am a ni?
Israel suolna le hremna
9 I hming tri hi a varthlak a nih.
LALPA chun Jerusalem mi po po,
Inring takin a ko a nih:
“Hmol le a hmangtu thu poisa ro.
10 Aw, sungkaw rilohai,
Indik naw taka in ro khawlhai,
Inkhǐna indik lo in hmanghai,
Ka theinghil el ding am a ni?
11 Phahla indik naw hmangtu le
Bukna lung indik naw koltu chu,
Thiem changin ka’n suo ding a ni?
12 In mi hausahai an tawrot a,
In mipuihai an khĕlhlip a,
An leiin thukhêl a per suok.
13 Chuleiin, hrem ka ti chêu a,
In suol leiin sukram ka ti cheu.
14 Fâng in ta, khop si loin,
In phìng khom trâm zing a tih.
Sêk khawl in ta, hum thei si loin;
In hum sun indonaah bo a tih.
15 Chîng in ta, sîk si loin;
Oliv hriek sir sawr in ta,
Nangnin hmang phak si loin;
Grep ra sir sawr in ta,
A uoiin dawn phak si loin.
16 Lal Omri um danhai zuiin,
Lal rilo Ahab insŭng chǐng dan,
An ser le sanghai in zawm leiin,
Khaw ramah siem ka ti cheu a,
Mi nuizat le hmusit phur in tih.