Israel chungpikna
7
1 Mi rimsi ka va hang ni ngei de!Nipui thei an lo vong hnung,
Grep ra an lawr vong hnunga,
Lo threl zonga fe ang ka nih;
Ka chăk ĕm êm grêp hmin le,
Theichang hmin a um ta nawh.
2 Pathien ngaisak mi po po hlak,
A rama inthokin an phìt fai a,
Mi indik an um ta dĕr nawh.
Inthat tumin an inchăn tuo a,
An unauhai chu man tumin,
Lèn chawiin an invĕ tuo a.
3 Thil thra naw thawna dingin,
An kuthai a chemkal a.
Hotuin thilpêk an phŭt a,
Rorêltuhan thamna an ngiet a,
Thilthawtheihan an dit danin,
Iengkim mi an hnaw lui a,
Inthukopin thil an phier.
4 Anni laia an mi thra tak khom,
Buor hlo ang chauh hi a na,
Anni laia mi indik tak khom,
Dai hling nei nêkin a se lem.
Nangni vengtu a chèt ve hun,
Pathien kan cheu hun a tlung a,
An chi-ai tran ta hle a nih.
5 I tuolbawmhai ring naw la,
I ruol thra khom ring naw la,
I trânga inbeinu laka khom,
Fimkhur takin bau phong rawh.
6 Naupan a pa sukmuolpho a ta,
Naunu a nu lakah hel a ta,
Moin a tarpi do a ta,
Mihriem tin hmêlmahai chu,
Ama sûnghai ning an tih.
7 Kei ruok chun beiseina leh,
Ka LALPA chu thlîr ka ta,
Ka Tlantu Pathien nghâk ka ta,
Ka Pathienin mi ngaithlang a tih.
Israel sandamna
8 Ka hmelma, mi diriem naw!
Ka tlua chu tho nawk ka tih.
Thim hnuoiah inthrung lang khom,
LALPA chu ka var ning a tih.
9 Ama lakah ka suol leiin,
LALPA lungsenna phur ka tih,
Ka chungthu mi hrilpui a,
Indika a mi sie chenin.
Aman varah mi thruoi suok a ta,
A felna chu hmu tang ka tih.
10 Chu pha chun ka hmêlma,
“Khawm LALPA i Pathien chu teh?”
Mi titu chu inzaknan tuom a ta,
Ka mit ngeiin a tluk hmung ka tih;
Tu khom hin kotthler chirhak anga,
Kea sir pher ni mêk a tih.
11 I kul banghai bawl nawk hun le
I ramri zauh bel ni la tlung a tih.
12 Chu ni chun Asuria ram dam,
Aigupta khawpuia inthok dam,
Aigupta le Eufretis inkara mi dam,
Tuipui le tuipui inkara inthok dam,
Tlâng le tlâng inkara inthok dam,
I kuomah mihai hung an tih.
13 Ram chu a sunga chenghai leh,
An thil suol thawhai leiin,
Ràusan ramah inchang a tih.
Trongtraina le inpâkna
14 Ram hnuoi, tlatna hnienghnara,
Anni chaua tla i rochan ran ruol hi,
I hmolin anni chu vĕng la,
Tiena Basan le Gilead hmun hringa,
An tlat khawm duol duol ang khan,
Tla khawm nawk ta raw hai se.
15 “Aigupta rama inthoka
In hung suok lai ni ang khan,
Thilmak inentir nawk ka tih.”
16 Thilthawtheina nei ve ta lo,
Hnam tinhai chun hmung an ta,
Inzakin bău hup an ta,
An nà khom sêt vong a tih.
17 Rûl angin pilvut liek an ta,
Bokvâka invâkhai ang elin,
An umna kuoa inthokin,
Inthin pumin hung suok an ta;
LALPA ei Pathien kuoma chun,
Tri êm êmin hung an ta,
Nangma leiin tri’ng an tih.
18 Nang anga suol ngaidam hlak,
Hlaa um i rochanhai bawsietna,
Ngaidam thei Pathien dang,
Tu am an um hrim hrim a?
Kumkhuoa lungsen nuom lo a,
Zangaina inhmutir chu i lawm si.
19 Kan chungah za ngai nawkin,
Kan suolnahai sir deng i ta,
Kan bawsietna po pohai chu,
Tuipui mongah pei hmang i tih.
20 Tiena kan pi le puhai kuoma,
Inkhâm meua i tiem ang khan,
Jakob chungah sukdik i ta,
Abraham chungah zà ngai i tih.