Bethlehema Lal
5
1 Aw kula inhuon Jerusalem,I sipai ruolhai khâwm rawh,
Inhuolin ei um ta si a.
Israelhai rorêltu bekah,
Hmolin an hem ding a nih.
2 Sienkhom nang Bethlehem, Efrata,
Judai khawpui lai chin hlê la khom,
I sunga inthokin Israel rorêltu,
Ka ta dingin hung suok a tih;
A trobul chu tiena tlanga mi,
Chatuona inthoka suok a nih.
3 Chuleiin, nau hase tuortunuin,
Nau a nei thlàk hmâ khat chun,
Israel chu maksanin um a ta;
Chu zoah a unau hlaa umhai chu,
An saltangna hmuna inthokin,
Israel ramah kîr nawk an tih.
4 LALPA hratnaa chun ngîrin,
LALPA a Pathien hming ropuiin,
A beramhai chu chawm a ta,
Muong takin khawsa tâng an tih,
Chu pha chun a hming ropuinan,
Hnuoi kil tawp dêng tâng a tih.
Intlanna le sietna
5 Ama chu muongna bul ning a tih.
Asuria-haiin ei ram hung rûn a,
Ei kul sunga hai an lŭt phâ chun,
A dotu ding berampu pasari le
Thruoitu pariet inngir suok ei tih.
6 Asuria ram, Nimrod ram chu,
Kawlhnâmin op khum an ta,
Ei ram rûn a, ramri a tlung pha,
Asuria lakah mi san suok a tih.
7 Jakob thla hlaa la umhai chu,
Hnam hrang hranghai lai chun,
LALPA-a inthoka daidaw tla le,
Hlobet chunga raw sûr ang hi,
An la ni ding a ni si a;
Ruo chun mi a nghâk naw a,
Mihriem ta din a châm nawh.
8 Jakob thla hlaa la umhai chu,
Hnam chi tin lai um vèng an ta,
Ramsahai le beram ruol laia
Sakeibaknei vanglai chetlain,
A hmu phot se le pot chen a,
Santu tu khom an nei naw angin,
9 A hmêlmahai chungah lêng a ta,
A dotuhai chu sukboral a tih.
10 LALPA chun hieng hin a tih:
“Chu ni a hung tlung pha chun,
In sakorhai sukhlum ka ta,
In tawlailirhai suksieng ka tih.
11 In khawpuihai suksieng ka ta,
In kulpuihai sukchim ka tih.
12 In dawithiemhai that ka ta,
Mi dawi vêt ta ngai naw ti niu.
13 In milim kerhai suksieng ka ta,
In lung serhai vaw nawi ka ta,
Mihriem kuta siem thil hmaah,
Bokkhup ta ngai naw ti niu.
14 Nangni laia inthokin,
Asera lim thinghai phûr ka ta,
In khawpuihai suksieng ka tih.
15 Ka thu zawm lo hnam chungah,
Lunginsen le thin inlingin,
Phuba ka lâk ding a nih.”