JONA
Thuhma
Jona lekhabu hi Thuthlung Hlui Baibul ei hmang laia bu sawmthum pahnina, bung 4 le chang 48 a sei, kum 785-760 B.C inkâr vêla Jona ziek a nih. Israel lal Jeroboam Pahnina, Israel lalhai laia thilthawthei tak hnuoiah Jona chun zawlnei Amos hmain rong a bawl a. Chuong laia Israelhai theida le hmêlma tak chu Asuria-hai an ni a, an khawpui chu Ninevi a nih. An thil suol thaw insira an sim naw chun Ninevi khawpui chu Pathienin a hrem ding a nih ti thu hril dingin Pathienin Jona a tir a. A hmêlmahai kuoma thu hrila fe chu Jona chun a nuom naw a, anni chu hrem sien a ti lem a. Tlăn hmang a tuma chu Pathienin tuipuiah a hnot zui a, ni thum sung top ngapui sunga a khum hnungin vakamah an luok suoktir a, sienkhom a la tir lui ta tho tho. Rùn dâlin Ninevi khawpuiah thu a hril a, sienkhom an poisak leiin hremna an pumpel a, Jona lung a sen bêk bĕk a.
Hi chanchin tawite hi khawvela chanchin inlar pawl tak a nih. A thilsiemhai chunga Pathien thu hang neizie, Pathienin hmangaina le zangaina a hauzie, a mi thlanghai suknomnatu le hmêlmahai khom hrem le suksiet nĕka an suol an sim phot chun a ngaidam hlakzie hi lekhabua hin chieng takin ei hmu thei. Hi lekhabu hi Judahaiin Inremna Ni (Yom Kippur) khûn taka an inser chănga an tiem ngei ngei hlak chu a nih.
A thu tlângpuihai
Jona’n Pathien tirna a sèl (1:1-17)
Jona simna le san suoka a umna (2:1-10)
Ninevi khuoa Jona thu hril (3:1-10)
Ninevi chunga Pathien zangaina (4:1-11)