LALPA tlàng
4
1 Sienkhom hun nuhnunga chun,LALPA tempul ngǐrna tlàng chu,
Suknghetin hung um a ta,
Tlâng po po sìngtu ning a ta,
Muol po po chungah lêng a ta,
Hnam tin khuoi ang kai an tih.
2 Hnam tam takin hung pan an ta,
Hieng ang hin hung ting an tih:
“Hung ta um, LALPA tlàngah,
Jakob Pathien inah kâi ei tiu,
A lampui ei hraw theina dingin,
A lampui thu mi lo zirtir a tih.”
Zion tlanga inthokin dàn thu,
Jerusalem-a inthokin LALPA thu,
A luong suok ding a ni si a.
3 Hnam tin inkârah ro rêl a ta,
Kil tina um hnam hrathai khom,
An inkar thu rêlpêk a ta,
An kawlhnàmhai chu làngkawnah,
Lo keina dingin sut an ta,
An fei chu thing kau thrumna,
Chemkuoiah sut tang an tih.
Hnam dang le hnam dang karah,
Chemsen inlêng ta naw ni a,
Raldo inchûk ta naw bok an tih.
4 Mi tin mani grep buk hnuoiah,
Theichang buk zăr hlim hnuoiah,
Muong takin thrung tang an tih,
Tiin Iengkim LALPAN a hril.
5 Hnam tinin an pathien zui an ta,
Keini chun kumkhawtluongin,
LALPA kan Pathien zui kan tih.
Israelhai kir nawkna ding
6 LALPA chun hieng hin a tih:
“Chu ni a hung tlung pha chun,
Kebaihai ko khawm ka ta,
Saltănghai ko khawm ka tih,
Lungngaia ka siem po pohai.
7 Kebaihai chu hlăng ka ta,
Hnot lĕnga um tahai chu,
Hnam hrât takah siem ka tih.
Chu nia inthok chun LALPAN,
Zion tlangah kumkhuoin,
An chungah ro rêl a tih.
8 Aw nang, ran ruolhai vĕngbŭk,
Zion naunu kulpui nghet,
Kha hmaa i lalram kha,
Tungdingin um nawk a ta,
Jerusalem naunu inlal a tih.
9 Ieng leia tuta i trap rak am?
Lal i nei naw am a ni?
I remruottu a boral am a ni?
Nau hase anga nâ chun,
A man tah che am a ni?
10 Aw nang Zion naunu,
Nau hase tuor ang elin,
Na tak tuorin inrûm rawh.
Ramhnuoia inkul dingin,
Tuhin khawpui suoksan rawh,
Babulonah i fe ding a na,
Chu chun san suokin um i tih.
Chu taka inthok chun LALPAN,
I hmêlmahai kuta inthokin,
A san suok ding chè a nih.
11 Tuhin hnam tam takhai chu,
Do ding che’n an insingsa a;
‘Sukporchèin um sien la,
Zion chu inriem khum ei tih’
Tiin an ti el che a ni hi!
12 Sienkhom LALPA ngaituona,
An man phak teu si naw a;
A remruot an hriet phak nawh,
Hrizawla chìl ding buphal anga,
Anni la khawmtu a ni si a.
13 “Zion naunu, tho la, chîl rawh,
Kapathîr ki pe’ng ka ti che,
Ke tinbawrah dâr pe’ng ka ti che,
Hnam tam tak sir nawina ding.”
Dan loa hlawkna an donghai chu,
LALPA kuomah hung inhlàn unla,
An hausakna chu hnuoi pum neitu,
LALPA kuomah inhlàn rawh.