Thruoitu le zawlneihai a hal
3
1 Chu zoah hieng hin ka hril a:“Jakob sungkuoa lukhâituhai,
Israel sungkuoa rorêltuhai,
Ka thu hi lo ngaithla ro,
Rorêl dan hriet a thra naw maw?
2 Thil thra tieng in theida a,
Thil suol tieng in lawm thung a,
Ka mihai vun in hǐkpĕk a,
An ru-a taksa in ăt thlăk a;
3 Ka mihai taksa in fàk a,
An vun in hǐk thlakpek a,
An ruhai in vuok tliek a;
Thlĕngah an sa in chan dar a,
Bêl sûng sa angin in ngai” tiin.
4 Chu zoah LALPA ko an ta,
Sienkhom lo don tawl naw nih.
Chu phâ an suol thawhai leiin,
An lakah hmai lo thup a tih.
5 LALPA chun hieng hin a tih:
“Ka mihai hlĕmtu zawlneihan,
Thil pêk ding neihai kuomah,
Thlamuongna thu an puong a,
A pe thei nawhai ruok chu,
Dorâlah an puong nghal hlak.
6 Chuleiin zan thimin nangin,
Inlàrna hmu naw ti niu;
Thimnain bawm a ti cheu a,
Ai khom sân thei naw ti niu.
Zawlneihai ni chu tlâng a ta,
An sùn chu zàn inchang a tih.
7 Hmutheitu chu inzak a ta,
Aisânthiem chu muolpho a tih.
Pathiena inthoka donna,
A um ta si naw leiin,
Inzakin hmai hup an tih.”
8 Nisienlakhom kei ruok chu,
Jakob bawsietna puong ding le
Israel suolna inhriettir dingin,
LALPA Thlarau thilthawtheina,
Rorêl indikna le hratna chun,
Inthuom sipin ka um si a.
9 Jakob sungkuoa lukhâituhai,
Israel sungkuoa rorêltuhai,
Rorêlna indikhai pal zŭt a,
Dikna tinrêng chokchawrawituhai,
Ka thil hril hi lo ngaithla ro.
10 Zion chu thisenin in indin a,
Jerusalem chu ritlonain.
11 Hotuhan tham beiseiin ro an rèl a,
Thiempuhan hlaw beiseiin an zirtir a,
Zawlneihan sum beiseiin ai an sàn a.
Chuong sa khom chun anni chun,
‘Ei kuomah LALPA a um an naw?
Sietnan mi nang naw nih’ tiin,
LALPA chungah an innghat chu!
12 Chuleiin, nangni lei tak hin,
Zion chu lo anga inletin um a ta,
Jerusalem chu tlu ram a ta,
Tempul muol chu chîmbuk bawm,
Muol pâwngah inchang a tih.