Mihriem tum le Pathien tum
2
1 Suol phantuhai chung a pik,Khum laizawla suol phiertuhai!
Zing khuo a hung var pha leh,
An phier angin an hlen hlak,
Chuong thawtheina chu an nei.
2 Mi lo an inhnar a, an lăkpĕk a,
Mi in an inhnar, an lăkpêk bok.
Dawhain mi in an neipĕk a,
An rochan chen an lakpek hlak.
3 Chuleiin, LALPAN hieng hin a tih:
“In sungkaw sietna ding hi,
In pumpel thei dêr lo ding,
Keiman ka phan zing a nih.
Chapoin lêng ta nawng in ta,
Sietnan hung nang a ti chêu.
4 Chu ni chun mihan nuizatin,
Trap hla phuok el an ti cheu:
‘Rok ramin kan um ta a,
Kan ram a sem dar vong a;
Kan kuta inthokin a lâk a,
Phatsantuhai kuomah a sem.”
5 Chuleiin, LALPA mihai inkhawma,
Thrum vawra ram insemtu ding hrim,
Mi tu khom nei naw ti niu.
Zawlnei tehlemhai
6 Anni rawi chun ka kuomah,
“Kan kuomah thu hril naw la,
Hieng hi mi hril vet naw rawh;
Muolpho nawng kan tih” an tih.
7 Aw nangni Jakob sungkuohai,
“LALPA Thlarau a lungsen maw?
Hieng thilhai hi a thaw hlak maw?”
Ti zawnga hril lem ding a ni?
“Indik taka khawsahai chungah,
Ka thu’n kongro a suk naw a ni?
8 Tu lai hnai hin ka mihai chu,
Hmêlma angin in en a.
Indona hmuna inthoka,
Ralmuong taka hung kirhai chu,
An korfuolhai in làkpèk a.
9 An in inhoi taka inthokin,
Ka mi, nuhmeihai in hnot suok a.
An nauhai mal ka sawmna chu,
Kumkhuoin in lăk hmangpek.
10 Tho unla, fe suok vat ro,
In ta dingin a ralmuong nawh;
Siem thrat thei ruol lo khopa
Sukporchè le suksiet a ni tah.
11 Khêla mi hlĕm hmang hungin,
‘Uoiin le zu pe treuh kan ti cheu’
Tiin hung hril sienla cheu,
Chu mi chu hi mihai zawlnei,
Ni âwm lek a ni hrim a nih!
San suokna thu tiem
12 “Aw Jakob thlahai, matheiloin,
In rêngin ko khawm ka ti chêu a,
Israel thla, hlaa umhai po po chu,
La hung thruoi khawm ngei ka ta,
Ran huonga beram ruol ang le
Ran tlatnaa bawng ruol angin,
Anni chu hung thruoi ka ta,
Mipui inzi nuoi nuoi an tih.
13 Kot hongtun hma thruoi a ta,
Kot kânin lut hum hum an ta,
An lal chu an hmaah feng a ta,
LALPA chun hma thruoi a tih.”