MIKA
Samaria le Jerusalem chungthu
1
1 Juda lal Jotham hai, Ahaz hai le Hezekia hai inlal laia Moreset khaw mi Mika kuoma inlarnaa Samaria le Jerusalem chungthua LALPA thu hung tlunghai chu:2 Hnam po pohai, lo ngai unla,
Hnuoi le a sunga umhai, ngaithla ro,
Lalpa PATHIEN chun a chengna,
Hmun Thienghlima inthokin,
Nangni kal zawnga hrepuituah,
A hung thrang ding a nih.
3 Ngai ta! a chèngnaa inthokin,
LALPA chu hung trum a ta,
Hnuoi hmun sanghai chîl a tih.
4 Mei bula khuoihlu sie angin,
A hmaa tlanghai chu zop an ta,
Trêna tui luong thlŭr sung angin,
Ruom inthlêr sungin siem a tih.
5 Hieng hi Jakob bawsietna lei le,
Israel sungkuo suolna lei a nih.
Jakob bawsietna bul chu iem?
Samaria-ah a ni naw am a ni?
Judai ram hmun sang chu iem?
Jerusalem a ni naw am a ni?
6 “Chuleiin Samaria chu khaw ram,
Hmunhnok bŭmna anga siemin,
Grep chingna hmunah siem ka ta,
A lung chimhai chu kor ruomah,
Inhlum thlapêk vong ka ta,
A lungphŭmhai dâwk vong a tih.
7 A limbiekhai vaw nawi ka ta,
Tempul nawchizorhai laka,
A thilpêk hmu po po khom,
Meiin raw hmang vong ka ta,
A milimhai suksieng ka tih.
A thilpêk dong po po chu,
A nawchizorna man a na,
Nawchi man a ni ang hrimin,
Nawchi manah hmang nawk an tih.”
Trapna le lusûnna
8 Hi lei hin trap khêk ka ta,
Ke lawng le saruoka invâkin,
Sihal angin inhrâm ka ta,
Chingpirinu angin tuibira ka tih.
9 A hliemna dampui ruol an nawh;
Judai ram khom a tlung ta a,
Ka mihai kotkhar bul hiel,
Jerusalem chen a tlung tah.
10 Gath khuoah hril naw unla,
Trap khom trap hrim hrim naw ro.
Beth Ofra khawa ruok chu,
Pilvut lai zâl inbuol ro.
11 Nangni Safiraa chênghai,
Saruok le inzak takin,
Ama chu fè pĕl unla,
Zanan hmuna chênghai chu,
Hung suok dok ve naw ni hai.
Beth Ezel chun lu a sùn a,
A’n humhimna a chân ta si.
12 Marot-a chênghai chu,
Na tuorin an in-iel a,
Dam nghakhlain an thlir a,
Jerusalem kot bul chenin,
LALPA-a inthoka sietna chun,
A hung nang phak ta si a.
13 Nangni Lakis-a chênghai,
Sakor tawlailir buotsai ro,
Zion naunu suolna bul chu,
Nangni hi in ni si a;
Israel bawsietna chu,
Nangni-ah a um a nih.
14 Chuleiin Moreset Gath kuomah,
Inthlàna thilpêk pe rawh.
Akzib chu Israel lalhai ta dingin,
Hlêmtu hung inchang a tih.
15 Maresa tukdol dingin,
Hnètu la hung tir ka ta;
Israel ropuina chun,
Adulam hung tlung a tih.
16 Pûr doin lu vaw kol rawh,
I nau dithai pûr chu doin;
Mulukol anga kolin,
A mĕtin mêt kâwng vong rawh,
I kuta inthokin salah,
An thruoi hmang ding a ni si a.