OBADIA
1
Edom chungthu1 Hi hi Obadia inlârna hmu chu a nih. Edom chungthua Lalpa PATHIEN hril chu hieng hi a nih:
LALPA thucha chu kan lo hriet.
Hnamhai kuoma a palai tir chun,
“Edom do dingin inthok ei tiu”
Tiin anni chu a hril a.
2 Edom chungthua LALPA thu chu:
“Hnam lai sukchîn ka ti che a,
Nasa takin hmusit an ti che.
3 Nang, lungpui kak kâra chêng,
Hmun sângah umhmun khuor a,
‘Tu am hnuoia mi kei thla ding?’
Tia lungrila inhàntaw hlaktu,
I lungril chapona chun,
A hlĕm letdĕr chê a nih.
4 Mû anga vuong insàngin,
Arasi lai bu sep la khom,
Chutaka inthok khom chun,
Hung kei thla tho ka ti che”
Ti hi LALPA thu suok a nih.
5 “I kuomah rûkrù hungin,
Zanah roktu hung sien chu,
I va se nasa awm de aw!
An thil dithai po lain,
An rok hrep naw ding che maw?
Grep lotu hung hai sien,
Lo bâng an hlâ met naw ding?
6 Esau, an suosam phâ che chu,
I rosum thup an dit po lain,
An va rok nasa ding che de aw!
7 I tienga thrang po poin,
Ramri chen hung hnot an ti che.
Inrem taka i khawsakpuihan,
Hlèmin hnèng an ti che a,
I bei fatuhaiin châng,
I awkna ding kam an ta,
Sienkhom hre si naw ti nih.
8 “Chu ni chun Edom mi varhai,
Esau tlanga hrietna neihai chu,
Ka sukbohmang naw ding maw?”
Ti hi LALPA thu suok a nih.
9 “Aw Teman, i pasalthrahai chu,
Triin inthin hâwp an ta,
Esau tlanga mi po po chu,
Sàt hlumin um vong an tih.
Edom a hremna san
10 “I unaupa Jakob chungah
Tharum i lo insuo leiin,
Inzaknan inkhum a ti che a,
Kumkhuoa suksiet ning i tih.
11 Mikhuolin a hausakna,
Roka an phur suok ni khan,
Nang chun i lo ràl thlìr a,
Kul kotkharah an lŭt a,
Jerusalem chungthua thrum,
An vawr lai khan nang ruok chu,
Anni ang charin i um.
12 I unau vangduoi tuok ni’n,
I diriem ding a ni naw a,
Juda thlahaiin sietna,
An tuok niin hlim naw la,
Harsatna an tuok niin,
I’n iem rak ding a ni nawh.
13 Ka mihai siet tuok niin,
An kotkhàrah lût naw la,
Vangduoina an tuok niin,
An rinum tuor thlîr naw la,
An rosumhai la naw rawh.
14 A tlân suokhai that dingin,
Lam thruomah inchàn naw la,
Buoina an tuok nikhuo a,
A dam sun la umhai khom,
Mi kutah inmantir naw rawh.
Hnamhai chunga Pathien hremna
15 Hnam tin chungah LALPA ni,
A hung tlung hnai ta si a;
I lo thaw dàn ang charin,
I chungah thaw veng a ta,
I thilthaw dàn ang charin,
I lu chungah tlâng a tih.
16 Ka mihan ka tlâng thienghlimah,
Ka hremna no an dawn angin,
Hnam tinin dawn rop an ta,
Dawn an ta, lem thlang an ta,
Pieng lo angin la um an tih.
Israel ta dinga hnèna
17 Sienkhom Zion tlanga chun,
Intlansuokna la um a ta,
Tlâng thienghlim tak ning a ta,
Jakob le a thlahaiin,
Chu tlâng chu rochung an tih.
18 Jakob sungkuo chu mei ang,
Josefa sungkuo chu meichok ang,
Esau sungkuo chu bupawl ang,
An la ni ding a ni leiin,
Esau sungkuo kang hmang a ta,
Tu khom hlà um naw ni hai”
Ti hi LALPA thu suok a nih.
19 Judai ram sim tieng mihan,
Esau tlàng chu hluong an ta,
Phai zawl thrut hluotuhai chun,
Filistinhai ram chang an ta,
Efraim le Samaria ram khom,
A rêngin hluo sa’ng an ta,
Benjamin-in Gilead chang a tih.
20 Israel saltang hung kǐrhan,
Kanan ram hung hne’ng an ta,
Zarefa chen hluong an tih.
Jerusalema inthoka saltàng,
Sefarad-a chênghai chun,
Sim tieng khuohai chang an tih.
21 Zion tlang san suoktuhan,
Edom ram chu rûn an ta,
Esau tlang chu op khum an ta,
LALPA ram ni ta’ng a tih.