Tempul vadung
47
1 Mi chun tempul kotkharah a mi thruoi kir a, suo tieng ngha tempul kotkhar bula inthok chun tui a hung luong suok a, tempul chu suo tieng ngha a ni hrim a; tui chu tempul sim tienga luongin maicham chang tieng sîra chun a hung luong thla a. 2 Hmar tienga inthoka lŭtna kotkhara chun a mi thruoi suok a, sak tienga inthoka lŭtna kotkhar bul chen a mi thruoi a, chang tieng koa chun tui chu a hung luong suok a.3 Mi chun inkhina hmol chawiin sak tieng a pan a, meter 530 a’n khi chun tui chu a mi’n pal kaitir a, kemit chen a nih. 4 Chun, meter 530 a’n khi nawk a, tui chu a mi’n pal kaitir nawk a, khûp chen a ni ta a. Meter 530 a’n khi nawk a, tui chu a mi’n pal kaitir nawk a, kâwng chen a ni ta a. 5 Chun, meter 530 a’n khi nawk a, tui chu ka pal kai ruol loa lien le inhlieuna khopa inthûk, tu pal kai thei lo ding a hung ni ta a. 6 Mi chun ka kuomah, “Mihriem naupa, hi hi i hmu am?” a ta, vakama chun a mi thruoi kir a.
7 Vakam ka tlung chun a kam tuoka thing zîng khup el chu ka hmu a. 8 Ama chun ka kuomah, “Hi tui, khaw sak tienga luong hin Jordan vadung finin, Tuipui Thi-ah luong lut a ta, tuipui tui chu tui thienghlimah inchangtir a tih. 9 Vadung chu a luongna taphotah thilhring tinrêng pung an ta, nga hung tam èm ém an tih; hi tui hi tuipui al sukthienghlimna ding le a luongna taphota hring tinrêngin an dam phàna dinga hung luong a ni si a. 10 A kama chun ngamantuhai ngîr khup an ta, Engedi kăia inthoka Eneglaim kâi chenin len dengna hmun ning a ta, nga chi hrang hranghai chu Mediterranean tuipuia nga ang elin hung tam an tih. 11 Vakam chirdûp le dûmhai ruok chu chi khura hmang dingin la al zing tho a tih. 12 Vadung kam tuoka chun thei kung chi tinrêng tro a ta, an hna vuoi ngai naw ni a, kûr trukin ra insuo zing an tih. Tempula inthoka tui luong suokin a chawm leiin thla kipin rang an tih. A ra chu bu ding a na, a hnahai chu damna ding a nih” tiin.
Ramri ding
13 Lalpa PATHIEN chun hieng hin a tih: “Hieng ang hin Israel hnam sawm le hnam hnihai rochan ding ram chu thrèpêk i ta, Josefa chun chan hni chang a tih. 14 Ram chu chan inang sengin i sem ding a nih. In pi le puhai kuoma kut phar meua pĕk ka tiem tah a ni leiin, ram chu in rochan ning a tih. 15 Hi hi an ramri inthrè dàn ding chu ning a tih: Hmar tieng ramri chu Tuipui Lienaf inthoka Hethlon fe thlengin Hamat lutna kawnah Zedad khuo chen feng a ta, 16 Hamat le Berotha-ah fe pei a ta, Hamat kawn le Damaska inrìna laia um Sibraim fe thlengin, Hauran ramri bula um Hazer Hatikon chen feng a tih. 17 Hmar tieng ramri chu Tuipui Lienaa inthokin Damaska hmar tieng ramri bula Hazar Enan chen le Hamat ramri bul chen feng a ta, chu chu hmar tieng ramri ding chu ning a tih. 18 Sak tieng ramri chu Hauran le Damaska inrìnaa inthokin sim tieng panin feng a ta, Jordan vadung zui a ta, thlang tieng ramri chu Jordan vadung ning a ta, sak tieng chu Gilead ram ning a ta, ramri chu Tuipui Thi-ah fein, Tamar chen tlung a tih. Hi hi sak tieng ramri ding chu ning a tih. 19 Sim tieng ramri chu Tamar-a inthokin Meriba-Kades chen feng a ta, chu taka inthokin Aigupta Ruom hrawin Tuipui Lien chen tlung a tih. Hi hi sim tieng ramri chu ning a tih. 20 Thlang tieng chu Tuipui Lien leh inri’ng an ta, Hamat lutna kawn zawn chenin feng a tih. Hi hi thlang tieng ramri ding chu a nih.
21 “Chuong ang chun, ram hi Israel hnam laia a chî chǐin in insem ding a nih. 22 Nangni ta dinga rochan ding le nangni laia in saphuna chêng ram dang mi, nau le te neia khawsahai khom an chan ding ram in sem ding a nih. Anni chu Israelhai anga a ram mi hrim anga ngaiin, Israel hnamhai lai nangni ang bokin chan an nei ve ding a nih. 23 Hnam dang mihai chu tu hnam laia lo khawsa khom ni hai sien, an khawsakna hmuna chun an chan ding ram in ruotpek ding a nih” ti hi Lalpa PATHIEN thu suok a nih.