Kût huna lal thaw ding
46
1 Lalpa PATHIEN chun hieng hin a tih: “Suo tienga inthoka a chuonchung lutna kotkhar chu sinthaw hun ni ruk sung khâr in ta, chawlni le thla thar nia ruok chu in hong ding a nih. 2 Lal chu chuonchung lutna bul tuolpûka chun lut a ta, kotkhar bula chun ngîr a ta, thiempuhai chun pumraw thilhlân le inremna thilhlânhai chu inhlàn an ta, kotkhar bul tuolpŭka inthok chun Pathien chawibiek a ta, chu zoah suok a ta, kot ruok chu zan tieng chen khar lo ding a nih. 3 Vantlâng mipui khomin chawlni le thla thar nia chauh chu kotkhar bul tuolpûka inthok chun LALPA an chawibiek ding a nih. 4 Lalin chawlnia LALPA kuoma pumraw thilhlân a’n hlàn ding chu beramte paruk le beramchal pakhat, hmêl hem lo vong a ni ding a nih. 5 Beramchal pakhat peiah beiphit efa khat, beramtea ruok chu a pĕk thei ang ang, inhlàn a ta, chun efa khatah hriek hin khat pei inhlàn bok a tih. 6 Thla thar niah bawngchal tuoi pakhat, beramte paruk le beramchal pakhat, hmêl hem lo vong, inhlàn a tih. 7 Bu le bâl thilhlâna dingin bawngchal pakhatah beiphit efa khat, beramchal pakhat peiah efa khat, beramtea ruok chu a pêk nuom zât zàt peng a ta, hriek chu efa khat peiah hin khat ning a tih. 8 Lal chu a hung lŭt tieng kotkhar bul tuolpûkah lût a ta, chu taka bok chun suok nawk a tih.9 “Vantlâng mipui ruok chu kût nia LALPA hmaa an hung inlang pha leh, hmar tieng kotkhara lûthai chu sim tieng kotkharah suok an ta, sim tieng kotkhara lûthai chu hmar tieng kotkharah suok an tih. Tu khom a hung lŭtna tieng suok lovin a hma zawn khing tienga kotkhara chun a suok ding a nih. 10 Lal khom anni ruolin lût vĕng a ta, an suok ruolin suok vĕng a tih.
11 “Kût ni le kûtpuia bei an inhlàn chu bawngchal tuoi pakhat peiah efa khat, beramchal pakhat peiah efa khat, beramtea ruok chu an pek thei ang ang le efa khat peiah hriek hin khat pei a ni ding a nih.
12 “Chun, lalin ama lung puok le nuom thua LALPA kuomah pumraw thilhlân amanih inremna thilhlàn amanih a’n hlàn ding chun suo tieng kotkhar chu ama ta dingin hongpek ning a tih. Pumraw thilhlân le inremna thilhlânhai chu chawlnia a thaw hlak angin inhlàn a ta, chu zoah suok a ta, kotkhar chu khàr ning a tih.
Ni tina thilhlân ding
13 “Tŭk tin LALPA kuoma pumraw thilhlân dingin beramte kum khata upa, hmêl hem lo, in inhlàn ding a nih. 14 Tûk tinin beiphit inhlàn ding buotsai in ta, efa hmun ruka threa hmun khat le a hmet zoina ding hriek hin hmun thuma threa hmun khat leh; chu chu kumkhawa LALPA kuoma bei inhlàn dàn ding chu a nih. 15 Hieng ang hin pumraw thilhlâna inhlàn rop dingin beramte dam, beiphit inhlàn ding dam le hriek inhlàn ding dam tŭk tinin in buotsai hlak ding a nih” a ta.
Lal ram pêk
16 “Lalpa PATHIEN chun hieng hin a tih: Lalin a naupahai laia mi tu kuoma khom a rochana mi thilpêk a pêk chun a thlahai ta ning a ta, an rochan hung ning a tih. 17 Sienkhom, a rochana mi chu a siehlaw tu amanih kuomah a pêk chun, bawi insuo kum chenin nei a ta, chu zoah lal kuomah a pêkkir nawk ding a nih; lal ro pangngai chu a naupahai ta ding a nih. 18 Chun, lalin mihai rochan a lâkpĕk ding a ni naw a, an in le loa inthokin a hnot suok ding a ni bok nawh. Mani in le loa inthoka ka mihai sukthlong an ni nawna dingin, lal chun ama ta ngeia mi chu a naupahai kuomah rochanin a pêk ding a nih” tiin.
Tempul choka
19 “Chun, sim tienga inthoka lutna bula thiempuhai umna pindan thienghlim, hmar tieng nghaa chun a mi thruoi a, a châwr, tlâk tienga hmun um chu a mi’n entir a. 20 Ama chun ka kuomah, “Hi hi thiem naw chang leia hlanbiekna thilhlan dam le suol ngaidamna thilhlan dam an suongna hmun le bu le bal thilhlâna an beiphit hung pekhai an urna hmun chu a nih. Mipui chunga thil poi a tlung pal nawna dingin thil thienghlim hrim hrim a chuonhnuoi zawla lak thlâk ding a ni nawh” a ta. 21 A chuonhnuoi tuolzawla chun a mi thruoi a, a mi fangpui a, kil tina chun tuolzawl tekêm a lo um vong a. 22 An huonna kil lia tuolzawl tekêm, banga inhuon chu a dung meter 21.2 le a khang meter 15.7 seng a nih. 23 Chuong tuolzawl tekêm sir tuok chu lungrem vong a na, a hnuoia chun a vêlin thlai suongna ding thuk a um a. 24 Chun, ka kuomah, “Hienghai hi thlai suongna hmun, tempula rongbawltuhaiin mihai hlànbiekna sa an suongna hmun chu a ni hih” a ta.