Tempulah LALPA a kîr nawk
43
1 Chun, mi chun suo tieng kotkharah a mi thruoi a. 2 Ngai ta, suo tienga inthoka LALPA ropuina hung chu ka hmu a. A rawl chu tuipui insok ri ang a na, a ropuinain hnuoi chu a êng var phût a. 3 Inlarna ka hmua a’n lang dan chu khawpui sukse dinga a hung trum le Kebar vadung kama inlàrna ka hmu truma mi ang bok kha a na, hnuoi sikin ka bokkhup a. 4 Suo tieng kotkhara inthokin LALPA ropuina chu tempula chun a hung lŭt a. 5 Chun, Thlarauin a mi chawi kang a, tempul chuonchunga chun a mi’n thrum a, LALPA ropuinain tempul chu a sip a.6 Mi chu ka bula a ngìr laiin tempul sŭnga inthokin tuin amanih mi hung bein ka hriet a. 7 Ama chun, “Mihriem naupa, hi hi ka lalthrungpha umna hmun, ka kepha innghatna, Israel nauhai laia kumkhuoa ka chĕngna ding hmun chu a nih. Israel sungkuo le an lalhaiin ka lakah uirein, hringna nei lo an lalhai milim biek chu zuiin ka hmun thienghlim hi sukporchè ta ngai naw ni hai 8 Ka sumphuk bulah an sumphuk rem a, ka kotkhar bieng le an kotkhar bieng intâwka siem a, kan inkàrah bang chauh an intlàktir lai khan an thilthaw tirdakum tak chun ka hming thienghlim an sukporchè a; chuleiin, ka lungsenin anni chu ka hrem a nih. 9 Tuta inthok hin chu an nawchi zorna bànsan hai sien, an lalhai limbiek, hringna nei lo milimhai chu sie hmang bok hai sien la, anni lai kumkhuoin chêng ka tih.
10 “Nang mihriem naupa, Israel sungkuo kuomah tempul lim kan hmutir che le a rem dan ding hril la, an thil suol thaw inzak nachang hre raw hai se. 11 An thilthawhaiah inzakna an nei chun, tempul um dan ding hai, a lŭt le suokna ding hai, a riruong iengkim, a hmang dan ding le vong dan dinghai inentir rawh. An mithmua ngei ziek thla diem rawh, ringum taka a riruong ang chu zui a, a thaw dan dinghai chu an zawm theina dingin. 12 Hi hi tempul hmang dan ding chu a nih. Tempul ngìrna tlang sipzawl chen hi hmun thienghlim tak a nih. Hi hi tempul an vong dan ding phung chu a nih.
Maichàm
13 “Tong seia hmanga inkhiin maicham lienzie chu hieng ang hin ning a tih: a thrut chu centimeter 53, a khang lienzie chu centimeter 53, a rei chu puo tienga inthoka inkhiin centimeter 23 peia dâwk insang a nih. 14 Maichàm chu a thruta inthoka a zuk innghatna sordawk chǐn lem chen chu meter 1.1 a insang le centimeter 53-a lien a na, a sordawk chǐn lema inthoka a sordawk lien lem inkar chu meter 2.1 insâng le centimeter 53-a lien a nih. 15 Maicham chung zawl chu meter 2.1-a insâng a na, chu zawl kil lia inthok chun ki pali a hung dăwk suok a. 16 Maicham chung zawl chu kil li nei a na, a dung meter 6.4-a sei le a khang meter 6.4-a lien a nih. 17 A sordawk chu a dung le a khang meter 7.4 ve ve a na, kil li nei a na, a rei tlang chu centimeter 27-a insang a nih. A thrut chu a vêlin centimeter 53-a lien a nih. Maicham panna kailawn chu suo tieng nghaa um a nih.
18 Ama chun, “Mihriem naupa, Lalpa PATHIEN chun hieng hin a tih: maicham hi bawl a ni phaa maicham chunga pumraw thilhlanhai in inhlan dan ding le thisen in thè dan ding chu hieng ang hin a nih: 19 Levi chia mi thiempu Zadok thlahai, ka rong bawl dinga mi hung hnai hlaktuhai kuomah suol ngaidamna thilhlana dingin bawngchal tuoi i pek hlak ding a nih ti hi Lalpa PATHIEN thu suok a nih. 20 A thisen iemani zat la’ng i ta, maicham ki li le a rei po po le a thrut sordawk kil li le a rei po po nàl i ta, maicham chu inthienin inremna i siem ding a nih. 21 Suol leia hlànbiekna bawngchal tuoi chu la’ng i ta, hmun thienghlim puo tienga hmun ruota chun i raw hmang ding a nih.
22 “Chun, a ni hninaa chun kelchal, hmêl hem lo chu suol ngaidamna thilhlâna dingin i’n hlàn ding a nih. Bawngchal tuoi thisena maicham in inthien ang bok khan maichàm chu in inthien ve ding a nih. 23 Maichàm inthien in thaw zo hnungah ran ruol laia mi bawngchal tuoi, hmêl hem lo le beramchal, hmel hem lo chu in inhlàn ding a nih. 24 LALPA hmaah inhlan in ta, thiempu chun machi phul a ta, LALPA kuoma pumraw thilhlânah inhlàn a tih.
25 “Ni sari sung chu ni tin suol ngaidamna dingin kelchal inhlàn in ta, ran ruol laia mi bawngchal tuoi le beramchal, hmêl hem lo chu in inhlân bok ding a nih. 26 Maichàm inthien faina dingin ni sari sung ăwng a ta, chu zoah sawp fai in ta, maichàm chu ser thienghlim hung ni tang a tih. 27 Chuonghai chu thaw zo a ni pha leh, ni riet nia inthokin thiempuhaiin pumraw thilhlân le inremna thilhlanhai chu maichàmah inhlàn an ta, keiin lo pom ka tih ti hi Lalpa PATHIEN thu suok a nih” a ta.