4 Chun, mi chun hmar tienga inthoka lŭtna tempul kota chun a mi thruoi a. LALPA tempul chu LALPA ropuinain a sip a, hmaia hnuoi sikin ka bokkhup a. 5 LALPA chun ka kuomah, “Mihriem naupa, fimkhur takin en la, LALPA tempul hmang dan ding chungthua dan ka hrilhai po po che hi chîk tak le lung lût takin ngaithla rawh. Tempula lŭt dan le hmun thienghlima inthoka suok danhai hi i lungrilin inchik rawh. 6 Hel hmang Israel sungkuo kuomah hieng hin hril rawh: ‘Lalpa PATHIEN chun hieng hin a tih: Aw Israel sûngkuohai, in chìng dan tirdakum hi ka nghok tawk tah. 7 In chìng dan tirdakum chu la dit tawk loin lungril le taksaa ser tan lo ram dang mihai chu ka hmun thienghlimah hung thruoiin ka tempul in sukporche a, bu le bâl le thău le thisen in inhlàn lai zingin ka thuthlung in bawsiet zing bok a. 8 Ka hmun in vong thienghlim naw a, a vongtu dingin hnam dang mi in sie lem a. 9 Lalpa PATHIEN chun hieng hin a tih: ‘Lungril le taksaa ser tan lo ram dang mi tu khom, Israelhai laia chênghai chen khom, ka Hmun Thienghlimah an lŭt ding a ni nawh’ ti hi.

10 “Milim hnota Israelhai an invàk hmang lai khan Levi thlahai khomin an mi’n hlat a, an bawsietna maw chu tuor an tih. 11 Ka Hmun Thienghlimah rong bawlin, kotkhar vêngtu ning an ta, mipui ta dinga pumrawa inhlàn ding le hlànbiekna dang dang a an thil inhlan ranhai chu thatpek an ta, an lo thrangpui ding a nih. 12 Mipuiin milim an biek lai khan an thil inhlanhai lo inhlànpektu an ni a, suola Israel sungkuohai intlûktirtu bul an ni leiin, an thil suol thaw maw an phur ngei dingzie kut phar meuin thu ka lo intiemkam tah a nih ti hi Lalpa PATHIEN thu suok a nih. 13 Thiempu angin ka hmaah rong bawlin an hung inlang ding a ni naw a, ka thil serhai le thilhlan thienghlimhai hnaia khom an hung ding a ni bok nawh; an thil chǐng tirdakum leiin inzakna tuok an tih. 14 Chuong sà khom chun tempul vèngtu le thaw ding um taphot thaw dinga tirtawnah ka sie tawl a nih.

15 “Thiempu, Levi chia mi, Zadoka thlahai ruok chu ka laka Israelhai an invàk hmang lai khoma ringum taka ka Hmun Thienghlim vongtuhai an ni leiin, anni chauh ka rong bawl dingin ka hmaah inlang thei an ta, thau le thisen ka kuomah hung inhlàn an tih, ti hi Lalpa PATHIEN thu suok a nih. 16 Anni chauh ka Hmun Thienghlimah lût an ta, ka rong bawl dingin anni chauin ka dawkan hung hnai thei an ta, ka rong bawl an tih.

17 “Tempul chuonchung an hung lŭtin pat zai inhmi hmanga khawng korfuol hâk an ta, a chuonchung zawl amanih tempul sŭng amania rong an bawl laiin sahmula siem silfen hrim hrim an inbel ding a ni nawh. 18 Pat zaia inthoka khawng lukawm kawm an ta, pat zai inhmi hmanga khawng kekor bun bok an ta, thlan suksuok thei chi ieng khom an inbel ding a ni nawh. 19 Chuonhnuoi zawla vantlang umnaah an fe pha leh an silfen inthlâk an ta, a siena dinga pindan ser hrana chun maksan an ta, silfen dang inbel an tih. Chuong naw chun an silfen thienghlim chu mipuiin tawk palh an ta, tuor pha rawi an tih.

20 “An lu an invaw koltir ding a ni naw a, sam an hla sei ding a ni bok naw a, an invawtir hlak ding a nih. 21 Tempul chuonchung sŭng an lŭt hnungin thiempu tu khomin uoiin an dawn ding a ni nawh. 22 Hmeithai amanih mi mâk hnung amanih nuhmeiah an nei ding a ni naw a, Israel thlaa mi nunghak thienglàm amanih le thiempuhai thi san hmeithaihai chauh nuhmeiah an nei ding a nih. 23 Thiempuhai chun thil ser thienghlim le thil naran danglamzie le thil porche le thil thienghlim thlier hrang dan ka mihai an inchuktir ding a nih.

24 “Thubuoi hrim hrimah thiempuhai chu roreltu ning an ta, ka dan thusuok angin an rèl ding a nih. Kût hmang dinga ka ruothai po poa chun ka danhai le thupekhai kengkawin, ka chawlnihai an vong thienghlim ding a nih.

25 “Mithi ruong hnaia fein thiempu chu an insukporche ding a ni nawh; mithi chu a nu le pa amanih, a naunu le naupa amanih, a unaupa amanih, a farnu, pasal la nei lo amanih a ni ruok chun insukporchè thei a tih. 26 A’n thienfai hnungah ni sari sung a la nghâk ding a nih. 27 Hmun Thienghlim chuonchunga hmun thienghlima rongbawl dinga a lŭt ni chun, ama ta dingin suol ngaidamna thilhlan a’n hlan ding a nih ti hi Lalpa PATHIEN thu suok a nih.

28 “Thiempu chun rochan ieng khom a nei ding a ni nawh; a rochan nei sun chu keima chauh hi ka ni ding a nih. Israelhai lai chanpuol ieng khom in pek ding a ni nawh; keima hi an chanpuol chu ka nih. 29 Fak ding an hung inhlàn hai, suol ngaidamna thilhlan le bawsietna chunga thilhlân an inhlanhai le Israel ram sunga LALPA ta dinga an thil serhai po po chu an ta ding a nih. 30 Ra hmasa laia a thra tak hai, in thil inhlàn tinrênga a thra tak hai chu thiempuhai ta ding a nih. Fak dinga beiphit thar in hmet hmasa tak chu thiempu kuomah inhlàn ro, in insŭngah malsawmna a châm zing theina dingin. 31 Thiempuhai chun sa tlaw hrim hrim, vate amanih, ran amanih, ram sain a sè le amaa thi amanih sa chu an fak ding a ni nawh.