Thiempuhai pindan
42
1 Mi chun tempul hmar tieng kota inthokin a mi suokpui a, a chuonhnuoiah kan lŭt a, a chuonchung bang le inzoma hmar tienga pindan tam tak an bawlna hmuna chun a mi fepui a. 2 Hieng hmar tieng nghaa pindan intlar hi a dung meter 53 le a khang meter 26.5 a nih. 3 Pindan thlêr khat chun a chuonchung tuolzawl meter 10.6 a lien tieng chu a ngha a; pindan thlêr dang chun a chuonhnuoi thlĕra lungrem tieng chu a ngha a; sawng thuma sawng tin bathlar chu an inhmaton a. 4 Hmar tieng ngha pindan kotkhar hmaia chun inlonna meter 5.3 a lien le meter 53 a sei a um a. 5 Pindan chunghnung tak chu inlonna ding bathlarin hmun a aw lien leiin a lailung le a hnuoi tienga pindan nêkin a chîn lem. 6 Sawng thum ni sien khom in dang anga ban nei ve lo a ni leiin, a hnuoi pindan nêkin a chung tieng pindan chu a chin hret hret pei a nih. 7 Pindan hrûla chun bang, meter 26.5 a sei, tuolzawl puo lem hnai tieng chun a um a. 8 Tuolzawl puo lem hnaia pindan tlar chu meter 26.5 a sei a na, tempul ep tienga pindan thler seizie chu meter 53 a nih. 9 A chuonhnuoi tuola inthoka pindan kai tungna kailawn chu suo tieng pangah a um a.10 Sim tieng khom tempul chuonhnuoi bang hrul, tuolzawl bul, bang puo tieng epin pindan tlar a um a, 11 hmar tienga mi ang charin pindan tlar inkara chun lampui a um a, a dung le a khang, a lŭtna le suokna kotkhar lienzie khom inang vonga bawl a nih. 12 Pindan tlar ep bang hrŭla chun suo tienga inthoka lŭtna kotkhar a um bok a.
13 Ama chun ka kuomah, “Tempul tuolzawl nghaa um sim tieng le hmar tienga pindanhai hi thiempuhai umna a na, LALPA hmaa inlang hlak thiempuhai chun hlanbiekna sa thienghlim chu hi hmuna hin an fàk ding a nih. Hlànbiekna thil thienghlim, bu le bâl thilhlân hai, suol ngaidamna thilhlân hai le bawsiet ngaidamna thilhlân hai chu an sie khawm ding a nih, Hmun Thienghlim a ni si a. 14 Chu Hmun Thienghlima thiempuhai an lut ta chun, a chuonhnuoi tuolzawla an fe nawk ding pha an rongbawlna silfen an hlǐp hmasa zet naw chun an suok phal a ni nawh, an silfen khom chu thil thienghlim a ni si a. Mipui umnaa an fe ding chun silfen an inthlak hmasa zet ding a nih” a ta.
15 Tempul le a tuol vêl po po a’n khi zo chun suo tieng kotkharah a mi suokpui a, tempul hmun lienzie chu a vêlin a’n khi a. 16 Sak tieng bang chu a’n khi a, a’n khìna hmol ang chun meter 265 a nih. 17 Hmar tieng bang a’n khi a, a’n khìna hmol ang chun meter 265 a nih. 18 Sim tieng bang chu a’n khi a, a’n khìna hmol ang chun meter 265 a nih. 19 Thlang tieng bang chu a’n khi a, a’n khìna hmol ang chun meter 265 a nih. 20 Chuongchun, a bang kil li a’n khi zo chun a dung meter 265, a khang meter 265 a nih. Bang chu Hmun Thienghlim le vantlang umna tuolzawl dâidantu a nih.