Tempul bang ringsana pindan siemhai
41
1 Chun, mi chun tempul chuonhnuoiah a mi thruoi a, kotkhar bieng banhai chu a’n khi a, meter 3.2 ve vea sa le sei a nih. 2 A lutna bang le bang inkar lienzie chu meter 5.3 a na, a sîr ve vea bang chu a khang meter 2.7 a nih. Hmun Thienghlim sung chu a dung meter 21.2 le a khang meter 10.6 a nih. 3 Chu zoah tempul sungrila chun a lût a, kotkhar bienghai a’n khi a, meter 1.1 a lien ve ve a nih. A lutna kot chu meter 3.2 a lien a na, a sir tuoka banghai chu meter 3.7 ve ve a nih. 4 Pindan sungril chu a’n khi a, a dung chu meter 10.6 a na, a khang khom, a tuol puo tienga bang chenin, meter 10.6 bok a nih. Ama chun, “Hi hi Hmun Thienghlimtak chu a nih” tiin a mi hril a.5 Chu zoah tempul bang chu a’n khi a, meter 3.2 sa a nih. Bang thrut ring chun puo tieng pindan meter 2.1 senga lien a um tluonsuok a. 6 Chuong a sir pindanhai chu sawng thuma insanga bawl a na, tempul bang ringsana innghat a um nawh. 7 Tempul bang inzui tung hret hret le inmilin pindanhai chu an iner tung hret hret thung a. Sawng hnuoi taka inthoka kai tungna kailawn chu a
8 Tempul sìr tuoka chun lungrem pawng ka hmu a, chuonghai chu a sîra pindanhai thrutin an hmang a, chu sor dawk chu inkhina hmol chena sei, meter 3.2 a nih. 9 A sîr pindan bang sazie chu meter 2.7 a na, chuong pindan hmaa chun meter 2.7 hmun awl a la um a. 10 Chu hmun awl le thiempuhai umna pindanhai chu thrangin tempul vel tuoka lungrem le a sunga pindanhai inkar khang lienzie chu meter sawm a nih. 11 Tempul sira pindan kotkharhai chu hmun awl tieng, hmar tieng le sim tieng nghain a um a, a vela hmun awl chu meter hni le a chenvea lien a nih.
12 Tlak tieng nghaa tempul tuolzawl chu meter 37.1 a lien a nih. A in bang sazie chu a vêlin meter 2.7 vong a na, a seizie chu meter 47.7 a nih.
13 Chun, tempul thrut lienzie chu a’n khi a, a dung meter 53 a na, tempul tuolzawl le in um chu meter 53 bok a nih. 14 Suo tieng tempul kota hmun awl le tuolzawl lienzie khom meter 53 a nih. 15 Tlâk tieng tuolzawl epa ngha tempul le a bathlarhai chu a’n khi a, meter 53 bok a nih.
16 Tempul sunga Hmun Thienghlim le Hmun Thienghlimtak, tuolzawl epa um tuolpûk bang le truong le tukver chînhai po po chu thingphĕka inthuo vong a nih. 17 Hmun Thienghlim lŭtna kotkhar lu chung le hmun thienghlim pindan le a tuol tieng pindan banga chun a’n khat tawkin cherub lim le tûm thing lim an ker a, 18 cherub inkarah tûm thing lim a um pei a, cherubhai chun hmai hni an nei seng a. 19 Khing khata inthoka tûm thing tieng ngha chun mihriem hmêl a put a, a khing tienga inthoka hung ngha chun sakeibaknei hmèl a put thung a. Chuong ang chun tempul sung inthuona thingphek banga chun a vêlin an ker a. 20 Hmun Thienghlim truonga inthoka kotkhar lu chung chen cherub le tûm thing lim an ker suok vong a nih.
21 Hmun Thienghlim lŭtna kotkhar bieng chu thing kil li neia siem a na, Hmun Thienghlimtak lutna kotkhar bieng khom chuong ang boka siem chu a nih. 22 Hmun Thienghlimtak kotkhar bula chun thinga siem maicham ang deu, meter 1.6 a insang le meter 1.1 a lien a um a, a kil le mong le a kawmhai chu thinga siem vong a nih. Chun, mi chun ka kuomah, “Hi hi LALPA hmaa dawkan chu a ni hih” a ta.
23 Tempul sŭng Hmun Thienghlim le Hmun Thienghlimtaka kotkharhai chu phel hni neia siem, 24 a laia nam hong thei a na, phel tin chu kopza pahnia inbûk a nih. 25 Hmun thienghlim lŭtna kotkhar puo tieng chun banga an ker ang bok cherub lim le tûm thing lim an ker a; a tuolpûk chunga chun thingphĕk an dăp a. 26 Tuolpûk bang a khing a khing chun tukver chikte a um a, chu taka chun tûm thing lim an ker a. Tempul sìra pindan lu chunga chun thingphĕk an dâp vong bok a.