Tempul thar hmun
40
1 Sala kan intanga inthoka kum sawmhni le pangana, Jerusalem sieta inthoka kum sawm palina, kum bul ni sawmna ni tak,a chun LALPA kut ka chungah a um a, chu taka inthok chun a mi thruoi a. 2 Pathien inlàrna chun Israel ramah a mi fèpui a, tlâng insang takah a mi thruoi a, chu sim tieng chun khawpui bawl thar ni awm tak hi a um a. 3 Chu hmuna chun a mi thruoi a, chu taka chun mi pakhat, a hmêl dâr anga tle hi ka hmu a; kotkharah a ngîr a, a kutin hrui zâi le inkhìna hmol a chawi a. 4 Chu mi chun ka kuomah, “Mihriem naupa, i mitin en la, i nain ngaithla la, thil ka’n entir ding che po po hi lung lût takin inchik rawh, chu dinga hi taka hung thruoi i ni si a. I thil hmuhai po po chu Israel sungkuo kuomah i hril sawng ding a nih” a ti a.Khawsak tieng kotkhar
5 Banga inhuon tempul ka hmu a. Miin inkhina hmol a chawi chu meter thumab sei a na, bang sàzie le insàngzie chu a’n khi a, meter thum vé vè a nih.
6 Chu zoah sak tienga inthoka lŭtna kailawna chun a lawn tung a, kailawn tawpa chun zawl, inkhìna hmol tlûk khata lien, a um a. 7 Lŭt peina sîr tuoka chun vĕngbûk pathum vé vè a um a, chuong vĕngbûk tin dung le khang chu inkhîna hmol tlûk khat vonga lien a na, vĕngbûk inkâr bang sàzie chu meter hni le a chenve a nih. Tempul tieng ngha tuolpûk khèla lŭtna kot bul truong zawl khom chu inkhìna hmol tlûk khata lien a nih. 8 Chun, tempul lŭtnaa tuolpûk chu a’n khi bok a, 9 meter li le centimeter hnia inpûk a na, meter khat biela lien ban a um a, kotkharpui tuolpŭk chu tempul tieng nghaa um a nih.
10 Sak tienga inthoka lutna sîr khing vé vèa vèngbûk pathumhai chu an intiet vong a, an inkàr bang sazie khom inang vong a nih. 11 Chun, a kotpui lŭtna khom chu a’n khi a, a khang chu meter nga a na, a seizie meter ruk le a chenve a nih. 12 Vèngbûk lutna bang thrut chu centimeter sawmngaa insang a na, a sung tieng ruok chu a sîr tuokin meter thum vong a nih. 13 Chu zoah vèngbûk epa lŭtna kotpui seizie chu vèngbûk chawr tieng banga inthokin a hma tieng bang tawp chen an khi nawk a, a seizie chu meter sawmpahni le a chenve a nih. 14 A sung bang inkar chu a lutnaa inthoka tempul tuolzawl tienga ngha tuolpûk chen a’n khi nawk a, meter sawmthum a nih. 15 Lŭtna tontira inthoka a suokna chen inkâr seizie chu meter sawmhni panga a nih. 16 Vèngbûk chawr tieng bang tina chun tukver chîn pakhat pei a um a, a sûnga pindan le pindan inkara chun tukver pakhat seng a um bok a. Lampui hrŭla pindan bang tina chun tûm thing lim an ziek a.
Tuolzawl puo lem
17 Mi chun tempul inhuonna sunga tuolzawl tontira chun a mi thruoi a. Tuolzawl sîr tuokin, kul puo tieng bang ringin pindan sawmthum an rem kuol a, chuong pindan tuol truong chu lung rem vong a nih. 18 Chu lŭtna kot zawn sîr vé vèa chun lungrem, a dung le khang intiet char a um a, chu chu a chuonhnuoi tuolzawl chu a nih. 19 Tempul chuonchung le chuonhnuoi chu a’n khi a, suo tieng le hmar tieng chu meter sawmnga ve ve a nih.
Hmar tieng kotkhar
20 Chun, hmar tienga inthoka lŭtna kot, tempul inhuonna sunga tuolzawl tontir zuk păwtu chu a dung le khang a’n khi bok a. 21 A lŭtna sîr tuoka vĕngbûk pathum vé vè le an inkâr bang le a bang thrut pawng bik dam le tempul tuol tienga ngha tuolpûk chu a’n khi vong a, suo tieng kotkhara mi leh an intiet char a, a dung meter sawmhnipanga le a khang meter sawmpahni le a chenve a nih. 22 A tukver hai, a bathlàr hai le tûm thing lim banga an ziekhai khom chu suo tieng kotkhar le inang char bok a nih. Kai tungna sirbi pasari a um a; tuolzawl a va păwna sìra chun tuolpûk a sûng tieng a um bok a. 23 Suo tieng kot ang charin tempul inhuonna sŭnga chun hmar tieng khom kot a um a. A chuonhnuoi le a chuonchung lŭtna le suokna kot inkâr chu a’n khi a, meter sawmnga a nih.
Sim tieng kotkhar
24 Chun, sim tieng a mi thruoi a, sim tieng nghaa um kotkhar chu ka hmu a. A kotkhar bieng hai le a tuolpûk hai chu a’n khi vong a, a danghai leh thuhmun char a nih. 25 A sûng tieng banga chun tukver chikté tè a um a, tempul inhuon sung tuolzawl va păwna sìra chun tuolpûk a sûng tieng a um a. A dang ang bokin a dung chu meter sawmhnipanga a na, a khang chu meter sawmpahni le a chenve a nih. 26 A kotkhar kai tungna chu sirbi pasari a um a, tuolpûk chu a sûng tieng a um a, a sûng bang khing tieng khing tieng chu tûm thing limin an chei a. 27 Tempul inhuonna tuolzawl chun sim tieng nghain kotkhar a nei a, chu kotkhar le tuol puo tienga inthoka lutna kotkhar inkar chu a’n khi a, meter sawmnga a nih.
Tuolzawl sung lem lutna kothai
28 Sim tienga inthoka a chuonchung lutna kota chun a mi thruoi a, kot bienga inthok chun a tuolpukhai chu a’n khi a, a danghai leh an inang char a. 29 Vèngbûk hai, a bang inkar hai le a tuolpûk hai chu kotkhar danga mihai leh an intiet char bok a. A bang sîr tuok le a tuolpuk tina chun tukver a um vong a. A dung seizie chu meter sawmhnipanga le a khang chu meter sawmpahni le a chenve a nih. 30 A vêla chun tuolpûk a dung meter sawmpahni le a chenvea sei le a khang meter hni le a chenvea lien a um a. 31 A tuolpûk chu a chuonchung tuolzawl tieng a ngha a, banga chun tûm thing lim an ziek a. A chuonhnuoia inthoka a chuonchung kai tungna sirbi chu pariet a nih.
Khawsak tieng kotkhar
32 Suo tienga inthoka a chuonchung lutna kota chun a mi thruoi a, a hang inkhi a, a danghai tiet bok a nih. 33 Vèngbûk hai, bang inkar hai le a tuolpûk hai chu a dang ang bok a nih. Tukver le tuolpûk a um ve vong a, a dung meter sawmhnipanga le a khang meter sawmpahni le a chenve a nih. 34 A tuolpûk chun a chuonhnuoi tieng a ngha a, khing tieng khing tieng pindan sung tienga banga chun tûm thing lim a um a, a hnuoia inthoka a chuonchung tieng kai tungna sirbi pariet a um bok a.
35 Chu zoah hmar tienga inthoka a chuonchung lutnaa chun a mi thruoi a, a’n khi a, a danghai tiet bok a nih. 36 Vèngbûk hai, a kâr bang hai, tuolpûk hai le tukver inhong hai chu a danghai ang char a nih. A dung chu meter sawmhnipanga le a khang chu meter sawmpahni le a chenve a nih. 37 A tuolpûk chun a chuonhnuoi tieng chu a ngha a, a banga chun tûm thing lim a um a, a hnuoia inthoka a chuonchung tieng kai tungna sirbi pariet a um bok.
Hlanbiekna thil an buotsaina
38 Hmar tienga inthoka a chuonhnuoi lŭtna sìra chun a lŭtnaa inthoka lŭt el thei in pakhat a um a, chu pindan chu pumraw thilhlân inhlàn dinghai insawp faina hmun a nih. 39 Kotkhar bul tuolpûk khing tieng khing tieng chun dawkan pahni a um ve ve a, chuonghai chu pumraw thilhlâna inhlàn ding dam, suol ngaidamna thilhlan dam le thiem naw changna laka inremna thilhlân an inhlàn ding ranhai an thatna hmun a nih. 40 Pindan puo tieng, hmar tienga inthoka lutna tuolpûk khing tieng khing tieng chun dawkan pahni a um ve ve bok a. 41 Chu taka pumraw thilhlan ding ran an thatna le buotsaina dawkan um po po chu pariet, a sung tieng pali, a puo tieng pali, a nih. 42 Chun, pumraw thilhlana hmang ding dawkan pali, lung sera siem, centimeter sawmngaa insâng le a chung centimeter sawmsaripanga biela lien seng a um bok a, dawkan chunga chun pumraw thilhlan le thilhlân dang danga ding ran an thatna hmangruohai chu an sie a. 43 Tuolpûk banga chun a vêlin sa khaina ding thîr kuoikim inkak, centimeter rieta sei an khai fur bok a. Dawkanhai chu hlanbieknaa ran an inhlanhai sa siena ding a nih.
Thiempuhai pindan
44 A chuonchung zawla hmar tienga inthoka lŭtna le sim tienga inthoka lŭtnaa chun in a um vé vè a, pakhatin sim tieng a ngha a, pakhatin hmar tieng. 45 Ama chun “Hmar tienga um, sim tieng ngha in hi tempula rongbawltu thiempuhai umna a ni a; 46 sim tienga um hmar tieng ngha in hi maichama rongbawl, thiempuhai umna a nih; chuonghai chu Zadok thlahai an ni a, Levi chihai lai khom anni chauh hi LALPA hmaah hung inlang a, a rong bawl thei hai chu an nih” tiin a mi hril a.
Tuolzawl sungril lem le tempul
47 Chun, a chuonchung zawl chu a’n khi a, a dung meter sawmnga, a khang meter sawmnga a ni a; tempul tuolzawl laili taka chun maicham a um a. 48 Tempul tuolpûka chun a mi thruoi a, a dona banhai chu a’n khi a, meter hni le a chenve biel vêl senga lien a nih. A lŭtna kot chu a khang meter sari-a lien a na, a sîra banghai chu meter khat le a chenvea sà a nih. 49 A tuolpûk chu meter sawma sei le meter ruka inpûk a na, a kai tungna dingin sirbi sawm a um a, a sîra chun sûtpui pakhat vé vè a ngîr bok a.