7 “Chun, ka mi Israelhai lai ka hming thienghlim inhriettir ka ta, ka hming thienghlim an sukporchè nawk phal ta nawng ka ta, chu pha chun hnam tinin kei hi LALPA, Israel Mi Thienghlim chu ka nih ti hre ta’ng an tih. 8 Ngai ta, a hung tlung mek ie! Hlenin um ngei ngei a tih ti hi Lalpa PATHIEN thu suok a nih. Chu ni chu a nih ka lo hril hlak kha. 9 Israel khawpuia umhai chu fe suok an ta, ralthuomhai chu meia ti ding thingah hmang an ta, kang hmang a tih: phaw lien le phaw chin hai, thal le a ngul hai, fei le a hmor zum hai chu kum sari sung thingin ring an tih. 10 Rama inthoka thing an fom ngai naw ni a, thing phûr bok naw ni hai a, an ralthuomhai chu thinga ti dingin hmang an ta, anni suomtuhai chu suom lêt an ta, a roktuhai chu rok lêt an tih ti hi Lalpa PATHIEN thu suok a nih.

11 “Chu ni chun Gog ta dingin inphŭmna hmun Israel ramah ruotpek ka ta, chu chu Tuipui Thi sak tienga ‘Khuolzin Ruom’ an tia chun ning a tih. Gog le a mihai po po an phŭm ding a ni leiin khuolzinhai fèna lampui hluong a tih. Chu ruom chu Hamon Gog tia ko hung ni tang a tih. 12 Israel mihai chun a rama inthoka ruong an inthiel faina ding le phŭmna dingin thla sari sung awng an tih. 13 A ram mipuihai chun phûm an ta, chu ni, chawimawia ka um ni chu an ta dinga ni inchik tlak ning a tih ti hi Lalpa PATHIEN thu suok a nih.

14 “A ram inthien faina sin thaw ngar ngartu dingin mi ruot an tih. A thren ruong zongin invâk vĕl an ta, a threnin ruong phûm loa um, hnuoia la zalhai chu phûm an tih. Thla sari a hung invoi hnungah ruong zong pawl chun an sin thaw tran an tih. 15 Ram fangtu pawlin mithi ruro an hmuna taphotah inchikna siem an ta, a phûmtuhaiin Hamon Gog ruomah phûm an tih. 16 (Chun, khaw pakhat, a hming Hamona tia ko um bok a tih). Chuong ang chun a ram chu inthiel fai an tih.

17 “Mihriem naupa, Lalpa PATHIEN hril chu hi hi a nih: Vate tinrêng le ramsa tinrêng ko suok la, an kuomah, ‘Inhawr khawm unla, Israel tlânga hai inhlanna ruoi ropui tak in ta dinga ka buotsai chu kil dingin kil tina inthokin hung ro. Chu taka chun sa le thisen fang in tih. 18 Beramchal le beramte, kelchal le bawngchal sa ang topin mi ropuihai sa fang in ta, hnuoia hotuhai thisen dawn in ta, an rêngin Basan rama ran châwm thau tak tak ang vong an nih. 19 Inhlanna ruoi ka buotsaipek cheua chun luok suok bŭr khopin in fa thau in ta, thisen khom inrui khopin dawn in tih. 20 Ka dawkana chun sakor le a chunga chuonghai sa dam, mi ropuihai le râl do mi chi tinrêng sa dam in dit tawkin fang in tih’ ti hi Lalpa PATHIEN thu suok a nih.

21 “Hnamhai chunga chun ka ropuina tar lang ka ta, an chungthu ka rĕl tah chu hlena an chunga kut ka thlakziehai chu hmung an tih. 22 Chu nia inthok chun Israel sungkuo chun LALPA an Pathien ka nizie hung hre tang an tih. 23 Hnamhai chun sala Israelhai an intangna san chu ka chunga ringum loa an suol lei a nizie hung hrieng an tih. Ka hmêl ka thup a, an hmĕlmahai kutah ka pêk a, kawlhnâmin an tlu ta vong a. 24 An tirdakumna ang pei le an bawsietna ang peiin an chungah ka thaw ve a, an lakah ka hmêl ka thup a nih.

25 “Chuleiin, Lalpa PATHIEN chun hieng hin a tih: ‘Tu hin chu Jakob saltang chu thruoi kîr ka ta, Israel sungkuo chu lunginsiet nawk ka ta, chuong ang chun ka hming thienghlim hi thrahnemngai takin humhal tlat ka tih. 26 Tu khom tri loa an ramah muong taka an chĕng nawk pha chun an muolphona le ka chunga an ringum nawnahai chu theinghil tang an tih. 27 Hnam danghai laia inthoka ka hung thruoi kir pha, an hmĕlmahai rama inthoka ka hung thruoi khawm pha chun, hnam tam takhai mithmuah anni hmangin ka thienghlimzie chu inentir ka tih. 28 Hnam tin lai salah intàngtir tawl lang khom, tu khom maksan nei loa an rama ngei ka hung thruoi khawm nawkzie an hmu pha chun LALPA an Pathien chu ka nih ti hung hre ta’ng an tih. 29 An lakah ka hmêl thup ta nawng ka tih, Israel sungkuohai chungah ka thlarau ka buok ta sia ti hi Lalpa PATHIEN thu suok a nih” tiin.