Gog chungthu hrilna
38
1 LALPA thu chu ka kuomah a hung tlung a. 2 “Mihriem naupa, Mogog rama mi, Mesek le Tubal hnamhai lu tak Gog chu hmason la, a chungthu ding hrilpêk rawh. 3 Lalpa PATHIEN chun hieng hin a tih: ‘Aw Gog, Mesek le Tubal hnamhai hotu tak, ka khing che a nih. 4 Innghakirtir ka ti che a, i khâkah ngakuoiin kuoi ka ti che a, i sipaihai po po, sakor le a chungchuong mihai, ralthuom kima inthuom hai, mi tam tak, phaw lien le phaw chin chawi hai le kawlhnâm viliktu hai le chun khai suok ka ti che. 5 Persia mi hai, Sudan mi hai le Libya mi hai chu phaw chawia thir lukhum khumin nangma le chun hung an ta, 6 Gomer le a sipai ruol po po hai dam, hmar tieng hla taka mi Bet Togarmat le a sipai ruolhai dam le hnam tam tak chu nangma ruolin hung an tih.7 “Chuleiin, inralring la, inpei la, i mi hawr khawmhai chunga thu petuah thrang rawh. 8 Ni iemani zat hnungah râl bei dinga ko ning i tih. Indonaa inthoka san suoka um le hnamhai laia inthoka lak khawma umhai chĕngna Israel tlâng, răusana um hlak chu la hung bei i tih. Anni chu hnamhai laia inthoka thruoi suok an ni hnunga thlamuong taka an rama khawsa an nih. 9 Chun, nang chu thlipui ang elin hrâng tung i ta, a ram chu sûm angin bawm khum i tih.
10 “Lalpa PATHIEN chun hieng hin a tih: Chu ni a hung tlung pha chun lungril thra naw hung put i ta, thil thra lo tak phier i tih. 11 ‘Ram, kul nei lo khuohai chu rûn ka ta, him taka um trok trok, kul nei loa chêng, kul kotkhar le a kalna thirhai khom nei ve lohai chu bei ka tih. 12 Chuong hnamhaia inthoka thruoi khawm, khaw ram tahnung hung hluo nawktu, ram lailia chêng, ran ruol le thuomhnaw hauhai chu rûnin rok ka ta, an chungah kut inlet ka tih’ ting i tih. 13 Seba le Dedan le Tarsis sumdawnghai le an khuohai po po chun, “Mi rok dingin i hung a ni maw? Kan tangkaruo hai, rangkachak hai, ran ruol hai le thuomhnaw hai nuom tawka roka phur hmang dingin maw i mihai i hawr khawm chu?” ting an ti che.
14 “Chuleiin, mihriem naupa, Gog chungthu chu hieng ang hin hrilpek rawh: Lalpa PATHIEN chun hieng hin a tih: Chu ni, ka mi Israelhai him taka an um hun ding chu i hriet naw maw? 15 I chĕngna hmar tieng ram tawpa inthokin hung i ta, i ruolin hnam tam taka mi sakor chungchuong ngot, sipai nawlpui ropui tak hung thruoi bok i tih. 16 Sûmin ram a tuom mup mup angin ka mi Israelhai chu hung tuom i tih. Chu ni hung tlung dinga chun aw Gog, nangma hmanga hnamhai mithmua keima ngeia ka thienghlimzie kan entir theina ding chein, ka ram bei dingin hung thruoi ka ti che.
17 “Lalpa PATHIEN chun hieng hin a tih: ‘Anni do dinga mi hung inthok ding thu, tiena tlanga inthoka kum tam tak sung ka siehlaw Israel zawlneihai hmanga ka lo inhril lawktir tah hlak kha, nang hi i ni naw maw? Chuong lai chun anni ka la’n dotir ding che thu hi kum tam tak an lo puong ngat ngat a nih. 18 Chu ni chun hieng ang hin ning a ta, Israel ram bei dinga Gog a hung pha chun ka lungsen suksosang a tih ti hi Lalpa PATHIEN thu suok a nih. 19 Ka lungsen sosângin ka hril a nih: chu ni chun Israel ramah lir nasa takin inhnîng a tih. 20 Tuia chêng ngahai, chungleng vate hai, ramsa hai le hnuoi chunga invak thilhring tinrêng hai le hnuoi chunga mihriem po pohai chu ka hmaah inthin an tih. Tlânghai inletkhup a ta, rawlhai chim a ta, bang po po hnuoiah tlu rem rum a tih. 21 Ka tlâng tina chun Gog bei dingin kawlhnâm ko khawm ka ta, mi tinin an kawlhnàm chu an unauhai chungah inlet an tih ti hi Lalpa PATHIEN thu suok a nih. 22 Hripui le thisena hremna chu a chungah intlungtir ka ta, ruopui vanawn le rielin nuoi a ta, ama le a sipaihai le hnam tam tak a hung thruoihai chunga chun mei le kât insurtir ka tih. 23 Chuong ang chun ka ropuina le thienghlimna chu inentir ka ta, hnam tam takhai mithmuah keima chu inhriettir ka tih. Chu pha chun LALPA chu ka nih ti hre ta’ng an tih.