Israel tlânghai chungthu
36
1 “Mihriem naupa, Israel tlânghai chungthu chu hieng ang hin hril rawh: ‘Aw Israel tlânghai, LALPA thu hi lo ngaithla ro. 2 Lalpa PATHIEN chun hieng hin a tih: ‘I hmêlmahai chun èsĕl takin, “Sei leh! Tlâng hluihai chu ei chang nawk an ta hi” an ti a. 3 Chuleiin, hieng ang hin an kuomah hril rawh: ‘Hi hi Lalpa PATHIEN thu suok chu a nih: Hnam danghai hluo le mihai dem phier le hril sieta um dinga sîr tinah beia an hnot thlŭr chêu leiin, 4 aw nangni Israel tlânghai, Lalpa PATHIEN thu hi lo ngaithla ro: Muol le tlâng hai, ruom le phai hai, khawpui ram ta le rausan ta hai, in kawl le kienga hnamhaiin roka an hmusit hai, Lalpa PATHIEN chun hieng hin a tih: 5 Ka thrahnemngai sosângin in sè vêla hnam danghai chu demin ka hril a nih. Edom lem chu ka dem nawkzuol. Dit tawka ka ran tlatna hmunhai suosam tumin, hlim tak le lungril se takin ka ram chu an lak a. 6 Chuleiin, Israel ram chungchang thu hrilin, muol le tlâng le ruom le phai hai kuomah hieng hin hril rawh. Lalpa PATHIEN chun hieng hin a tih: Hnamhai hmusit i tuor leiin ka thîkthu lung intarin ka hril a nih. 7 I sè vêla chêng hnamhai chun muolphona tuok vĕng an tih tiin Lalpa PATHIEN hin kut hlâng meuin ka’n tiemkam a nih.8 “Aw Israel tlânghai, nangni ruok chu in kăuhai hung inder tharin, ka mi Israelhai ta dingin ra insuong in tih, in tieng an hung kîr vak ding a ni si a. 9 Ka’n voi cheu a, ditsakna mitin en ka ti cheu. Inletin um nawk in ta, thlai chî thlâk an tih. 10 Nangni chunga chêng mihai chu sukpung ka ta, Israel sungkuo chen khom hung pung an tih. Khawpuihai chu hluo nawk an ta, hmun tlu ram tahai chu tungding nawk an tih. 11 Nangni chunga khawsa mi le sahai chu sukpung ka ta, hung hmuingîl an ta, tam tak hung ning an tih. Kha hma ang khan mihai inhluotir nawk ka ta, a hmaa nêka hmuingîl lemin siem ka ti cheu. Chu phâ chun LALPA chu ka nih ti hre ta’ng in tih. 12 Ka mihai, ka mi Israelhai ngei tuol lengna ning in ta, hluong an ti cheu a, an rochan ning in ta, an nauhai chu chân nawk ta ngai naw ti niu.
13 “Lalpa PATHIEN chun hieng hin a tih: Mihaiin, ‘Nangni mihriemhai fa zotu le in mihai khom an nauhai inchântir hlaktu’ ti hlak hai sienla chêu khom, 14 mihriemhai fa zotu ni ta naw ti niu a, in hnam chun a nauhai chân nawk ta ngai naw nih’ ti hi Lalpa PATHIEN thu suok a nih. 15 Hnam danghai èsĕlna le hmusitna tuor ta naw ti niu a, in hnam sukthlutu ni ta ngai bok naw ti niu’ ti hi Lalpa PATHIEN thu suok a nih, ti rawh” a ta.
16 “Chun, LALPA thu chu ka kuomah a hung tlung nawk a. 17 ‘Mihriem naupa, Israel sungkuohai chu an rama an chèng lai khan an um dan le thilthawin a ram chu an sukporchè a. Ka mita chu an um dan hi nuhmei thla pal lai anga tirdakum a nih. 18 A ramah thisen insuo a, milim bea an insukporchè leiin ka hnot suok tawl a ni kha. 19 Hnam tin lai ka sukdar a, ram tinah an um dar a; an um dan ang le thilthaw dan angin an chungah ro ka rèl a nih. 20 An fèna taphota hnamhai lai ka hming thienghlim an sukpawi a, mihaiin ‘Hienghai hi LALPA mihai an nia chu a rama inthokin a’n suoktir tawl a ni hi!’ an ti hlak si a. 21 Israelhaiin an fèna taphot hnamhai laia ka hming thienghlim an sukpawi hi ka lâi a nâ a nih.
22 “Chuleiin, Israel sungkuohai kuomah hieng hin hril rawh: ‘Lalpa PATHIEN chun hieng hin a tih: Aw nangni Israel sungkuohai, nangni ka lainat cheu lei ni loin, in fèna taphot hnamhai laia in sukpawi hlak ka hming thienghlim chu ka lainat lei lemin hieng thilhai hi ka thaw ding a nih. 23 Ka hming ropui tak, hnam danghai laia sukpawia um, nangni ngeiin in sukpawi chu, a thienghlimzie inhmutir ka ti cheu. An mithmu ngeia nangni hmanga ka thienghlimna ka’n entir pha chun LALPA chu ka nih ti hung hre tang an tih ti hi Lalpa PATHIEN thu suok a nih.
24 “Hnamhai laia inthokin thruoi suok ka ti chêu a, ram po poa inthoka thruoi khawmin in ramah thruoi kîr ka ti cheu. 25 Tui fimin buok ka ti cheu a, hung inthieng ta’ng in ta, tirdakum in kaihai po po le in milim bieknaa inthokin tlĕng fâi ka ti cheu. 26 Lungril thar pe’ng ka ti chêu a, in sungah thlarau thar sie’ng ka ta; in lungril, lung anga ngar chu la suokin, taksa anga innem lungril pe’ng ka ti cheu. 27 In chungah ka thlarau sie’ng ka ta, ka thu suokhai inzawmtirin ka danhai fimkhur takin invongtir a ti cheu. 28 In thlatuhai kuoma ka pĕk rama chun chêng in ta, ka mihai ni’ng in ta, in Pathien ni’ng ka tih. 29 In porchèna po poa inthokin san suok ka ti chêu a; fâng ko ka ta, a tontawin bu hau in ta, tràm intlâktir ta naw ning. 30 Thing rahai sukpung ka ta, in lohma sukthrâng ka ta, tràm leiin hnamhai lai muolphona tuok ta naw ti niu. 31 Chu pha chun in nun dan suolziehai le in thilthaw riloziehai hung hrieng in ta, suolna le thil tirdakum in lo chǐnghai lei chun nangni chen intirdak in tih. 32 Hieng thil hi nangni leia ka thaw a ni nawh ti hre ro ti hi Lalpa PATHIEN thu suok a nih. Aw Israel sungkuohai, in um dan chu inzăpuiin, inphalam tlok tlok ro.
33 “Lalpa PATHIEN chun hieng hin a tih: In suolnahaia inthoka ka sawp fai pha cheu leh in khawpuihai inhluotir nawk ka ti chêu a, hmun ram ta hnunghai chu indin thar nawk ka tih. 34 Chun, ram răusan ta hnunghai chu inlet nawk in ta, inzin inlonhai mithmuah răusan ram ni zing ta naw nih. 35 Anni chun, “Răusan ram ni hlak kha Eden huon ang elin a hung inchang nawk ta hi! Khawpui tlu ram hnung, răusan le suksieta umhai khom kha kula inhuonin an hluo nawk tah” ti’ng an tih. 36 In kăwl le kienga hnam la umhai chun a triek ta hnunghai tungding nawk a, a tlaran ta hnunghai phun thar nawktu chu kei LALPA hi ka nih ti hung hre ta’ng an tih. Chu thu chu kei LALPA hin ka puong a, ka hril ang takin thaw ngei ka tih.
37 “Hi hi Lalpa PATHIEN hril chu a nih: Israel sungkuo thil hni chu ngaithlapek nawkin, hi hi thawpêk ka tih: Israel sungkuo chu ran ruol anga tamin sukpung ka tih. 38 Jerusalema kût hmang huna hlănbiekna inhlàn ding ran ruol ang topa tamin khawpui tlu ram tahai chu mipuiin hung hluo sip nawk an tih. Chu pha chun kei hi LALPA chu ka nih ti hre ta’ng an tih” a ta.